-
حضرت خدیجہ رضی اللّٰہ عنہا وہ عفت وپاکیزگی کی روشن مینار تھیں،حیا وشرم ان کا زیور تھا، مکہ آپ کو طاہر ہ کے لقب سے پکارتا تھا،مکہ کی امیر ترین خاتون اور تاجرہ تھیں،دانا عقلمند اور غریبوں کی مسیحا تھیں،جانتے ہو یہ کون تھیں؟یہ نبی کی چہیتی بیوی حضرت خدیجہ رضی اللہ عنہا تھیں،آپ کے فضائل اور خوبیوں کی فہرست اس قدر طویل ہے کہ سفینہ چاہئے اس بحر بیکراں کیلئے۔
حضرت خدیجہ رضی اللہ عنہا ہمہ جہت خصلتوں اور بیش بہا خوبیوں کی پیکر تھیں،دور اندیش اتنی کہ نبی کی ذات میں نبوت کے آثار دیکھ لئے اور بڑھ کر مستقبل کے نبی کو اپناسرتاج بنا لیاتھا۔
وفا شعار ایسی کہ قلب رسول مرتے دم تک آپ کی یادوں کا امین رہا،کہتے تھے مجھے خدیجہ کی محبت پلادی گئی ہے،رسول اللہ کی ہمدردی ایسی کہ غار حراء کے بعد کامنظر یاد کرلو،دلاسے کے وہ جگمگ کرتے الفاظ ایک مہربان بیوی کے فلک پیما جذبات واحساسات کو نمایاں کرتے ہیں،نبی کی بے چینی اور اضطراب پر تڑپ کے کہا تھا سرتاج حوصلہ رکھو آپ انسانیت کے مسیحا ہیں اللہ آپ کو ضائع نہیں کریگا،امانت ودیانت میں رتبہ اس قدر بلند تھا کہ محمد رسول اللہ کی شان امانت کو دیکھ کر آپ کو اپنا جیون ساتھی بنا نے کا فیصلہ کرلیا،حق شناسی کی ادا ایسی کہ ایک آواز پر پہلے پہل ایمان لانے والی خاتون بن گئیں، علم ومعرفت کا پایہ اتنا بلند تھا کہ تحقیق حال کیلئے شوہر کو لیکرعیسائی عالم ورقہ بن نوفل کے پاس پہونچ گئیں،نصیبہ کیسا بلند تھا کہ آپ کے ذریعہ اللہ نے نبی کواولاد کی نعمت سے سرفراز کیا،جذبۂ فداکاری کتنا اعلیٰ تھا کہ زندگی بھر کی جمع پونجی راہ دعوت میں نثار کردی،اپنے مال کے ذریعہ نبی کے مشن کو مکی دور میں زندہ رکھابلکہ اسے پروان چڑھایا،استقامت کا عالم یہ تھا کہ ناز ونعم میں پلنے کے باوجود تین سال تک نبی کے ساتھ شعب ابی طالب میں فاقے کی شدتوں سے گزریں،مربیانہ کردارایسا کہ اللہ اللہ فاطمہ بنت خدیجہ خواتین جنت کی سردار بن گئیں،علی رضی اللہ عنہ حیدر کرار بن گئے،آپ کی دوسری دو بیٹیوں کے شوہر عثمان ذوالنورین بن گئے،کیا کہوں؟حوالوں کا ایک سلسلہ ہے جو لفظوں کے ساتھ بہہ جانا چاہتاہے۔
مکہ کے پرآشوب دورمیں رسول اللہ کیلئے خدیجہ کا وجود وہ گھنا سایہ تھا جہاں وقت کی گردشوں کا ستایا ہوا رسول سکون کے چند لمحے پاجایا کرتا تھا،وہ ڈھارس بندھاتی تھیں،حوصلے دیتی تھیں،شکستہ عزائم میں جان ڈال دیتی تھی،خود قوت ارادی بن کر روح نبوت میں سما جاتی تھیں،وقت کے بے رحم طوفانوں کے سامنے ڈٹ جاتی تھیں،لیکن یہ کیا؟زندگی کا سورج لب بام آگیا تھا،ایک ایسے وقت میں جب منہ زور آندھیاں کاشانۂ رسالت کو اکھیڑ دیناچاہتی تھیں،جان رسول خدیجہ زندگی کی بازی ہارگئیں،جانثار بیوی کی وفات نے فتنوں کا باندھ توڑدیا،ہر چہار جانب سے مصائب وآلام نے گھیر لیا،نبی نے اس سال کو غم کا سال قرار دیا، سچ تو یہ ہے کہ دنیا کا کوئی پیمانہ خلوص کے اس رشتے کو ناپ نہیں سکتا،شعر وسخن کی بلند پروازی محبت کی ان رفعتوں کا ادراک نہیں کر سکتی جو رسول اللہ اور خدیجہ کے درمیان پروان چڑھی تھی۔موت کے بعد بھی وفاشعار بیوی انکے وجود میں بسی رہی،دوسری شادیوں کے باوجود بھی قلب رسول انکی محبت کا دم بھرتا تھا،ان کی یادوں کو دل وجان سے لگا کے رکھاتھا،پوری زندگی انکی سہیلوں کو ہدیے وتحائف بھیجتے رہے،انکے رشتے داروں کی خاطر ومدارات کرتے تھے،انکے احسانات کا اعتراف کرتے رہے،یہاں تک کہ عائشہ کو کہنا پڑاکہ مجھے خدیجہ پر رشک آنے لگا تھا۔
اسوۂ خدیجہ موجودہ دور میں خواتین اسلام کیلئے نشان منزل ہے،کامیابی وکامرانی کی شاہ کلید ہے،آؤ۔۔۔۔۔اگر تمہیں ایک مثالی ماں بننا ہے،ایک مثالی خاتون بننا ہے،ایک مثالی بیوی بننا ہے ایک مثالی داعیہ بننا ہے تو ان کے بے لوث کردار کے چمکتے صفحات کو آنکھوں میں بسالو،ان کی پاک سیرت کی روشن کرنوں سے حیات مستعار کے تاریک گوشوں کو روشن کرلو،ان کی زریں تعلیمات کے آب حیات سے زندگی کے خشک شاخوں کو سرسبز شاداب کرلو،اس شعر کو اپنا مقصد بنا لو کہ:
کچھ ایسے نقش بھی راہ وفا میں چھوڑ آئے ہو
کہ دنیا دیکھتی ہے اور تم کو یاد کرتی ہے
نیا شمارہ
