-
اس شمارےمیں ’’اہل السنہ‘‘ کا یہ شمارہ ایک ہی مضمون پر مشتمل ہے جس میں احناف (دیوبندیوں) کی طرف سے حال ہی میں تحریف کردہ ایک روایت کی دلخراش داستان ہے ، ’’التمہید لابن عبد البر‘‘میں منقول ایک روایت سے عصر حاضر کے احناف ناف کے نیچے ہاتھ باندھنے پر استدلال کرتے تھے ، ہم نے اپنی کتاب ”انوار البدر فی وضع الیدین علی الصدر“ میں واضح کیا کہ اس کتاب کے اصل مخطوطہ میں وہ بات نہیں ہے جو مطبوعہ نسخہ میں ہے اور اس کے متعدد اور ناقابل انکار دلائل پیش کئے ، لیکن افسوس کہ احناف نے اس حقیقت کو تسلیم کرنے کے بجائے نہ صرف یہ کہ اپنی غلطی پر اصرار کیا بلکہ ایک گھناؤنی حرکت یہ کر ڈالی کہ’’ التمہید‘‘ ہی کا ایک مخطوطہ لیکر اس میں تحریف کرڈالا، پھر محرف صفحہ کا زیراکس لے کراسے ”الاجماع“ نامی شمارہ نمبر(۸) میں بڑے اہتمام سے پیش کردیا ، اور عوام کو مطمئن کرنے کے لئے پچپن (۵۵) صفحات سیاہ کرڈالے ۔
اور حیرت ہے کہ اتنا طویل مضمون لکھنے کے بعد بھی ”الاجماع“ والے اس بات کی جرأت نہیں کرسکے کہ اس مضمون کے لکھنے والے کا نام ظاہر کرسکیں ، شاید مضمون نگار نے خود ہی اپنا نام ظاہر کرنے سے منع کردیا ہو کہ مبادا ان کی تحریف کی پول کھل گئی تو نام مٹی میں مل جائے گا اور بڑی ذلت و رسوائی ہوگی ، بدقسمتی سے وہی ہوا جس کا انہیں ڈر تھا ، یعنی تحریف کے لبادہ میں چھپی اصل سچائی طشت از بام ہوگئی۔
’’اہل السنہ‘‘ کا یہ شمارہ احناف کے اسی ’’الاجماع‘‘ شمارہ کے جواب میں ہے ، ہم اہل السنہ کے اس شمارہ میں صرف یہ ثابت کریں گے کہ’’ التمہید لابن عبدالبر‘‘ میں منقول زیر بحث روایت کے اصل اور درست الفاظ کیا ہیں ، اس سلسلے میں ہم اس کتاب کے مخطوطات اور مطبوعہ نسخوں پر بحث کرتے ہوئے صرف اس روایت کے متن پر ہی بات کریں گے ، اور اس روایت کی سند پر جو اعتراضات ہیں، اس پر ہم ان شاء اللہ اہل السنہ کے اگلے شمارہ(۸۶) میں بحث کریں گے ، اس طرح احناف کے مذکورہ ”الاجماع“ شمارہ نمبر(۸) کا جواب ہمارے اہل السنہ کے دو شماروں پر مشتمل ہوگا ،چونکہ احناف کا مضمون بہت طویل ہے اس لئے ظاہر ہے کہ ہمارا جواب بھی طوالت اختیار کرے گا ، لہٰذا قارئین سے ہم معذرت خواہ ہیں ۔
واضح رہے ”الاجماع“ نامی شمارہ اہل حدیث کے رد میں نکالا جاتا ہے اس شمارہ میں نہ اداریہ ہوتا ہے ، نہ درس قرآن ، نہ درس حدیث اور نہ ہی کوئی اصلاحی مضمون ، بلکہ یہ شمارہ اہل حدیث کے رد سے ہی شروع ہوتا ہے اوراسی پر ختم ہوتا ہے۔
اس کے باجود بھی ”الاجماع“ والے ہر شمارہ میں ٹائٹل پیج کے بعد ”بادل نخواستہ“ کے عنوان سے اس بات کا رونا روتے ہیں کہ انہیں اہل حدیث کے خلاف بادل نخواستہ لکھنا پڑتا ہے۔
اب قارئین انصاف کریں کو جو شمارہ صرف اور صرف اہل حدیث پر رد کے لئے وقف ہو ، کیا اسے اس طرح کی باتیں زیب دیتی ہیں ؟
یاد رہے کہ ہمارے علم کی حد تک جماعت اہل حدیث کا کوئی بھی شمارہ ایسا نہیں ہے جو صرف دیوبندی حضرات کے رد کے لئے مختص ہو ، نیز یہ بھی یاد رکھیں کہ نماز میں ہاتھ باندھنے کے مقام سے متعلق پوری دنیا میں سب سے پہلے بحث و مباحثہ اور مناظرہ احناف نے ہی شروع کیا ہے وہ بھی آپس میں ہی ، جیساکہ ہم اپنی کتاب ’’انوار البدر‘‘ کے شروع میں عرض کرچکے ہیں ، بلکہ نماز میں سینے پر ہاتھ باندھنے کی تائید میں پوری دنیا میں سب سے پہلے ایک حنفی عالم محمدحیات السندی الحنفی نے ہی کتاب لکھی ہے ، تفصیل کے لئے ’’انوار البدر‘‘ دیکھیں ۔
پھر جب ان لوگوں نے اہل حدیث پر بھی طعن کرنا شروع کردیا تو اہل حدیث حضرات کی طرف سے بھی اس موضوع پر تحریری سلسلہ شروع ہوگیا ۔
حقیقت یہ ہے کہ اہل حدیث کی طرف سے اس طرح کی تحریریں دفاع ہی میں ہوتی ہیں ، یہ مضمون بھی دفاع ہی میں لکھا جارہا ہے ، لہٰذا قارئین اجماع والوں کے ”بادل نخواستہ“ والی نام نہاد پارسائی سے دھوکہ نہ کھائیں۔
اور اب ہم نے قلم اٹھانا اس لئے بھی ضروری سمجھا کہ اس دفعہ ”الاجماع“ والوں نے حسب عادت نہ صرف مغالطات سے کام لیا ہے بلکہ حدیث میں دانستہ تحریف کا بھی ارتکاب کیا ہے ، اس لئے دفاع حدیث کا تقاضہ بھی ہے کہ حدیث میں تحریف کرنے والوں کو فوراً بے نقاب کیا جائے،اس لئے یہ مفصل مضمون پیش خدمت ہے۔
نیا شمارہ
