-
نماز میں کمی زیادتی پر سجدۂ سہو واجب ہے عن اَبِي هُرَيْرَةَ رضي اللّٰه عنه: اَنَّ رَسُولَ اللَّهِ ﷺ قالَ: إِنَّ اَحَدَكُمْ إذا قامَ يُصَلِّي، جاءَ الشَّيْطانُ فَلَبَسَ عَلَيْهِ، حَتَّي لا يَدْرِيَ كَمْ صَلَّي، فَإِذا وَجَدَ ذَلِكَ اَحَدُكُمْ، فَلْيَسْجُدْ سَجْدَتَيْنِ وهو جالِسٌ۔
[صحیح البخاری:۱۲۳۲]
ترجمہ: ابوہریرہ رضی اللہ عنہ سے روایت ہے کہ رسول اللہ ﷺنے فرمایا :’’کہ تم میں سے جب کوئی نماز پڑھنے کے لیے کھڑا ہوتا ہے تو شیطان آ کر اس کی نماز میں شبہ پیدا کر دیتا ہے پھر اسے یہ بھی یاد نہیں رہتا کہ کتنی رکعتیں پڑھیں۔ تم میں سے جب کسی کو ایسا اتفاق ہو تو بیٹھے بیٹھے دو سجدے کر لے‘‘۔
اطرافہ: ۶۰۸،۱۲۲۲،۱۲۳۱،۳۲۸۵،تحفہ:۱۵۲۴۴
مسائل : (۱) نماز میں کمی زیادتی پر سجدۂ سہو واجب و مسنون ہے۔
(۲) حدیث میں لفظ ’’صلاۃ ‘‘مطلق ہے جوکہ فرض نماز اور نفلی نماز دونوں کوشامل ہے ،یعنی کہ بھولنے کے سبب فرض نماز کی طرح نفلی نماز میں بھی سجدہ ٔسہو ہے ۔
(۳) سجدۂ سہو میں سلام نہیں ہے۔
(۴) سجدۂ سہو میں تکبیر مسنون ہے۔
(۵) شیطان کا نماز میں وسوسہ ڈالنا ایک یقینی امر ہے ۔اس وجہ سے خیالات کو نماز ہی میں مرکوز رکھنے کی پوری کوشش ہونی چاہیے ۔
(۶) سجدۂ سہو کی تعداد دو ہے ۔
(۷) اس حدیث سے سلام سے قبل بھی سجدہ کی مشروعیت ثابت ہوتی ہے۔
(۸) نماز میں کئی چیزیں بھولنے پر بھی دو ہی سجدہ ہے ۔
(۹) بظاہر معلوم ہوتاہے کہ’’الشَّيْطانُ‘‘میں جو ’’ال‘‘ ہے وہ معہود ذہنی کا ہے ،اور وہ نماز کا خاص شیطان ہے جس کا نام ’’خنزب ‘‘، ہے وہی یہاں پرمراد ہے،جیساکہ صحیح مسلم میں عثمان بن ابو العاص رضی اللہ عنہ سے مروی ہے۔
[مرعاۃ المفاتیح شرح مشکاۃ المصابیح:۳؍۳۹۴]
(۱۰) شیطان انسان کے ساتھ ہروقت رہتا ہے یہاں تک کہ نماز میں بھی۔
نیا شمارہ
