-
فائدے کا سودا ’’دعا‘‘ بظاہر ایک چھوٹا سا لفظ مگر عملی اعتبار سے نہایت ہی اثردار ہتھیار، اِدھر آپ اپنے ہاتھوں کو اُٹھا کر رب سے کچھ مانگ رہے ہوتے ہیں اور اُدھر وہ رب عرش سے آپ کی مانگ کو پوری کرنے کے لیے کسی کے دل میں یہ بات ڈال رہا ہوتا ہے کہ فلاں کو مدد کی ضرورت ہے، جاؤ اس کی ضرورت پوری کر دو۔(اس طرح کے متعدد طریقے ہیں دعا کی قبولیت کے جو انسانی زندگی میں نظر آتے رہتے ہیں)مانگنے والے کی مراد پوری کر دی جاتی ہے اور دینے والا نظر تک نہیں آتا۔سچ کہا رب نے کہ جو اُس کا تقویٰ اختیار کر لے تو نہ صرف یہ کہ اس کی مشکل حل ہو جاتی ہے، اس کی دعا قبول کر لی جاتی ہے بلکہ اُس کو ایسی جگہ سے برکت دی جاتی ہے جہاں سے وہ سوچ بھی نہیں سکتا۔
مانگا کیجیے رب سے، آپ کا یہ مانگنا ہی آپ کو عظیم بناتا ہے، ورنہ جسے اپنے رب سے مانگنا نہ آتا ہو تو میرا رب اسے کچھ دینا تو دور کی بات اُس کی پرواہ بھی نہیں کرتا بلکہ اسے متکبر کہتا ہے اور ایسے شخص سے وہ ناراض و غصہ ہو جاتا ہے۔ کیا آپ اپنے رب کو اپنے حق میں ناراض کرنا چاہتے ہیں؟ کیا آپ خود کو متکبر کہلانا پسند کریں گے؟ نہیں نا اور یقیناً نہیں، تو بس ایک کام کریں اپنے ہاتھوں کو اٹھا کر اپنے بندہ و فقیر ہونے کا اظہار کیا کریں، بظاہر ضرورت نہ بھی ہو تب بھی۔(اس لئے کہ ہم تو مطلبی ہیں نا، مطلب پر ہی یاد کرتے ہیں اُسے)وہ تو یہی چاہتا ہے کہ میرا بندہ مجھ سے مانگے اور میں اس کی مانگ کو پوری کر دوں ذریعہ اور سبب جو بھی ہو۔
اور اس نیک کام کے لئے کسی خاص موقع یا وقت کا انتظار نہ کریں بلکہ اگر آپ اپنے گھر میں ہیں تو یکسو ہو کر مکمل اطمینان کے ساتھ ہاتھوں کو بلند کر کے اپنی حاجتیں، ضرورتیں اور پریشانیاں اس کی بارگاہ میں رکھ دیں کہ اسے صرف آپ کی عاجزی کا اظہار کرنا اور آنکھوں سے بہنے والے دو قطرے آنسو بہت پسند ہیں۔
اور ایک بات دوسروں کو بھی اپنی دعاؤں میں یاد رکھا کریں، کیونکہ کسی اور کے حق میں دعائیں کرنا بڑے فائدے کا سودا ہے، اس کے ذریعے انسان وہ چیز حاصل کر لیتا ہے جس کی دعا وہ کسی کے لئے کر رہا ہوتا ہے۔مزید کامیابی اور حوصلے کی بات تو یہ ہے کہ دوسروں کے لئے کی گئی ہماری دعائیں کسی نہ کسی صورت میں ہمارا سہارا بن کر ہمارے ہی سامنے آتی ہیں، سچ کہا شاعر نے:
نہ جانے کون دعاؤں میں یاد رکھتا ہے میں ڈوبتا ہوں، سمندر اچھال دیتا ہے
رب آپ سب کو خوش رکھے اور دنیا و آخرت کی تمام تر بھلائیوں سے نوازے۔آمین
نیا شمارہ
