-
انفاق فی سبیل اللہ کا شرعی ضابطہ عَنْ سَعْدِ بْنِ أَبِي وَقَّاصٍ، أَنَّهُ أَخْبَرَهُ أَنَّ رَسُولَ اللّٰهِ صَلَّي اللّٰهُ عَلَيْهِ وَسَلَّمَ قَالَ: ’’إِنَّكَ لَنْ تُنْفِقَ نَفَقَةً تَبْتَغِي بِهَا وَجْهَ اللّٰهِ إِلَّا أُجِرْتَ عَلَيْهَا، حَتَّي مَا تَجْعَلُ فِي فَمِ امْرَأَتِكَ‘‘
حضرت سعد بن ابی وقاص رضی اللہ عنہ سے روایت ہے کہ نبی کریم ﷺ نے فرمایا: ’’بیشک تم جو کچھ بھی خرچ کروگے اللہ تعالیٰ کی رضامندی کے لیے تو اس پر اجر پاؤگے یہاں تک کہ (اس پر بھی) جو(لقمہ)تم اپنی بیوی کے منہ میں رکھوگے‘‘
[صحیح البخاری:۵۶]
تشریح : مال انسان کو بے حد محبوب ہے (سورۃ عادیات:۸) اور وہ اسے ایسی جگہ خرچ کرنا چاہتا ہے جہاں اسے دنیوی فائدہ حاصل ہو اور اس کا مال ضائع نہ ہو،لیکن انسان اپنے پسند اور خواہش کی اتباع میں ایسی جگہ خرچ کرتا ہے جہاں اسے نفسیاتی طور اچھا تو لگتا ہے لیکن اجر نہیں ملتا ہے۔(سورہ البلد:۶) حالانکہ مال یہ انسان کے لیے بہت بڑی آزمائش ہے،کیونکہ اکثر لوگ مال کی محبت میں رب کے ذکر اور یاد سے غافل ہوجاتے ہیں،مال کمانے،خرچ کرنے، جمع کرنے اورلطف اندوز ہونے میں اللہ سے بیزار ہوجاتے ہیں پھر اللہ کی محبت پر مال ودنیا کی محبت غالب آجاتی ہے اور اس طرح مال کی آزمائش میں وہ ناکام ہوجاتے ہیں۔
اس حدیث میں یہ رہنمائی کی گئی ہے کہ خیر کی تمام جگہوں پر بندہ جب خرچ کرتا ہے تو اسے اللہ تعالیٰ اجر عطا کرتا ہے، یہاں تک کہ اپنی بیوی اور بچوں پر خرچ ہونے والے مال پر بھی اجر وثواب حاصل ہوتا ہے، بس اسے احتساب اور اجر کی نیت کرنی ہوگی۔ تاکہ ایک عام عادت بلکہ شہوت کاکام بھی باعث اجر وثواب بن جائے۔ لیکن بنا نیت کے بھی اجر وثواب کا وعدہ ان اعمال خیر پر موجود ہے۔ اس حدیث رسول سے فیملی پر مال خرچ کرنے کی زبردست ترغیب ہے، بیوی بچوں پر اللہ کا احسان ہے کہ ان پر خرچ کو فرض بھی قرار دیا اور باعث اجر بھی تاکہ فیملی خوش حال، پرسکون اور باعزت رہے اور یہ شریعت کے بڑے مقاصد میں سے ایک ہے۔ اس حدیثِ نبوی میں انفاق فی سبیل اللہ کے لیے دو اہم ضابطہ بیان کیا گیا ہے۔
ایک: اخلاصِ نیت،یہ بہت اہم اور بنیادی ضابطہ ہے اور تمام عبادات کے لیے ہے کہ خرچ کا مقصد رب کی رضا اور آخرت میں اجر وثواب کی نیت ہو۔ اس کی دلیل حدیث کا یہ ٹکڑا ہے:
’’تَبْتَغِي بهَا وجْهَ اللّٰهِ‘‘
دوسرا: بھلائی اور نیکی کی جگہوں پر خرچ کیا جائے،حرام جگہوں پر خرچ کا کوئی اجر و ثواب نہیں ہے بلکہ انسان گنہگار ہوجاتا ہے، اس کی دلیل حدیث کا یہ ٹکڑا ہے:
’’حتّٰي ما تَجْعَلُ فى فَمِ امْرَأَتِكَ‘‘
ایک تیسری چیز بھی اس حدیث میں ہے کہ قریبی لوگوں پر خرچ کرنا زیادہ باعث اجر وثواب ہے،لہٰذا انہیں نظر انداز نہ کریں بلکہ سب سے پہلے انہیں پر خرچ کریں جیسے بیوی بچے،والدین،سگے بھائی بہن اور دوسرے قریبی رشتہ دار۔ وغیرہ
اچھی نیت سے اچھی جگہوں پر اپنا حلال مال خرچ کرنا رب کو بہت پسند ہے،اس حدیث میں اس کی ترغیب دی گئی ہے۔اللہ ہم سب کو انفاق فی سبیل اللہ کی توفیق بخشے ۔آ مین
فوائد :
۱۔ انفاق فی سبیل اللہ ایک بہترین،مبارک،نفع بخش اور محبوب عمل ہے۔
۲۔ انفاق کی کوئی حد نہیں ہے بلکہ وہ حسب استطاعت بہت معمولی بھی ہوسکتا ہے جیسے کھجور کا نصف حصہ۔
۳۔ ہر کام میں اخلاص نیت ضروری ہے، نیت کی درستی سے اعمال قبول ہوتے ہیں اور عادات کے کام عبادت کا درجہ حاصل کرلیتے ہیں۔
۴۔ ہرخیر کے کام میں انفاق پر مومن کو اجر ملتا ہے اور نیت پر مزید اجر عطا کیا جاتا ہے۔
۵۔ گھر والوں پر خرچ کرنا بھی اجر وثواب کا کام ہے۔
۶۔ نکاح کرنا اور شادی شدہ زندگی اسلامی زندگی ہے۔
۷۔ بیوی کو اپنے پاس رکھنا شریعت کو مطلوب ہے۔
۸۔ بیوی کے ساتھ محبت ، احسان اور لطف وکرم کرنا اسلامی تعلیم ہے۔
۹۔ اس حدیث سے ہمیں حسن اخلاق،نصیحت وتلقین، سخاوت، انفاق، حسنِ نیت اور امید کی تعلیم ملتی ہے۔
۱۰۔ بندوں کے اعمال کی جزا کے لیے ایک عظیم دن کا وجود فطری ضرورت ہے۔
٭٭٭
نیا شمارہ
