-
شیخ الاسلام ابن تیمیہ اور ان کی کتابوں کا تعارفی سلسلہ قسط نمبر(۴) اس مرتبہ شیخ الاسلام کی عقیدہ کے باب میں لکھی ہوئ کتاب ” العقيدة الواسطية “کا تعارف پیش خدمت ہے ۔
تاریخ تالیف: شیخ الاسلام نے یہ کتاب سنہ 698ھ میں یہ کتاب تالیف کی ہے۔(شرح العقيدة الواسطية – عبد الرحيم السلمي (1/ 6)
تالیف کے وقت عمر:
شیخ الاسلام تالیف کے وقت 33 سال کے تھے۔(شرح العقيدة الواسطية – عبد الرحيم السلمي (1/ 7)
سبب تالیف:
سرزمین واسط سے شافعی مسلک سے تعلق رکھنے والے رضی الدین نامی ایک قاضی حج کی نیت سے نکلتے ہیں اور ان کی ملاقات شیخ الاسلا م سے ہوتی ہے ،وہ شیخ الاسلام سے عرض کرتے ہیں کہ آپ عقیدہ میں کوئ کتاب لکھ دیں ، شیخ الاسلام نفی میں جواب دیتےہیں مزید کہتے ہیں کہ ائمہ سلف نے عقائد پر کئ ایک کتابیں لکھی ہیں ،انہی میں سے کوئی کتاب لے لیں ،لیکن انہوں نے اصرار کیا اور کہا کہ مجھے وہی پسند ہے جو آپ لکھ دیں ،چنانچہ شیخ الاسلام نے اسے عصر سے مغرب کے بیچ میں لکھ کر مکمل کردیا ،پھر اس کے متعدد نسخے مصر ،عراق وغیرہ میں عام ہوگئے ۔(مجموع الفتاوى (3/ 164)۔
وجہ تسمیہ:
واسط عراق کا ایک شہر ہے ،جسے حجاج بن یوسف نے بسایاتھا ،واسط اس وجہ سے نام رکھا گیا کیونکہ یہ شہر بصرہ اور کوفہ کے درمیان میں واقع ہے ۔( معجم البلدان (5/ 347).
اس کے علاوہ اور بھی واسطیہ کی وجہ تسمیہ لوگوں نے ذکر کیاہے۔مثلا اس کی نسبت وسطیت کی جانب ہے ،جس کا مطلب ہے کہ وسطیت اہل السنہ والجماعت۔ دیکھیں (التحفة الندية شرح العقيدة الواسطية – عبد الرحمن العقل (ص19)
لیکن راجح واسط شہر کی جانب ہی نسبت ہے ۔ اور اگر وسطیت مان بھی لیں تو پھر نام اس طرح ہونا چاہئے “العقيدة الواسطية“نہ کہ واسطیہ ۔اور بعض مصری طباعتوں میں جو “العقيدة الواسطية” مذکو ر ہے وہ سہو ا ہے۔دیکھیں ( التحفة الندية شرح العقيدة الواسطية – عبد الرحمن العقل ۔ص18-19)
چند نمایاں خصوصیات:
1-اس کتاب میں جو بھی باتیں بیان کی گئ ہیں ، وہ تمام باتیں کتاب و سنت اور اجماع سلف سے ثابت ہیں ۔
2-اس کتاب میں بیان کئے گئےعقدی مسائل کسی خاص امام کے آراء پر مشتمل نہیں ہیں ،بلکہ جو بھی مسئلہ بیان کیا گیاہے وہ سلف صالحین کے عقیدہ کے مطابق بیان کیا گیا ہے۔واضح رہے اہل سنت والجماعت عملی مسائل میں مختلف ہوسکتے ہیں ،لیکن اعتقادی مسائل میں سبھی متفق ہیں ۔
3-الفاظ کا انتخاب اور چناؤ بڑی باریکی اور بالغ نظری سے شیخ الاسلام رحمہ اللہ نے کیا ہے ،اسی وجہ سے مناظر ہ کے وقت شیخ الاسلام نے فریق مخالف کو چیلنج کرتے ہوئے انہیں تین سال کی مہلت دی کہ اس مدت میں وہ کوئ بھی ایسی ایک بھی بات اس کتاب میں دکھادیں جو سلف صالحین کے عقیدہ کے خلاف ہے ۔اس سے آپ کی تحریری فصاحت اور عقیدہ میں بے انتہا جانچ پڑتال کا پتا چلتا ہے۔
4-اس کتاب میں عقیدہ کے کسی ایک پہلو پر شیخ الاسلام نے گفتگو نہیں کیا ہے ،بلکہ عقیدہ سے متعلق اساسی اور اصولی کئ سارے مسائل کا شیخ الاسلام نے احاطہ کیاہے ۔جیسے اسماء وصفات ، معاد ،ایمان ،قدر وغیرہ۔
5-ہر زمانہ میں علماءنے اس کتاب کی تعریف کی ہے ،جیسے امام ذہبی ،ابن رجب وغیرہ ،اسی طرح کتاب کو درس نظامی میں بھی باقاعدہ شامل کرکے حرفا حرفا اساتذہ نے پڑھایا اور طلبہ نے پوری کتاب کو حفظ بھی کیا ۔(شرح العقيدة الواسطية لخالد المصلح (1/ 3)
کتاب کاعلمی مقام و مرتبہ:
قال الذهبي رحمه الله فى حكاية مناظرة شيخ الإسلام: ووقع الاتفاق على أن هذا معتقد سلفي جيد.
امام ذہبی رحمہ اللہ شیخ الاسلام کے مناظرہ کی حکایت بیان کرتے ہوئے کہتےہیں “اس بات پر اتفاق ہے کہ یہ ایک بہترین سلفی العقیدہ کتاب ہے ۔
( نقله ابن عبد الهادي في العقود الدرية ص (212)
قال العلامة ابن رجب رحمه الله أيضًا: ووقع الاتفاق … على أن هذه عقيدة سُنية سلفية۔
علامہ ابن رجب رحمہ اللہ کہتے ہیں “اس بات پر اتفاق ہے کہ یہ سب باتیں سلفی العقائد ہیں ۔
(ذيل طبقات الحنابلة (4/ 511)
قال الشيخ السعدي رحمه الله: جَمَعت على اختصارها ووضوحها جميعَ ما يجب اعتقاده من أصول الإيمان وعقائده الصحيحة۔
شیخ سعدی رحمہ اللہ کہتےہیں “اختصار اور وضاحت کے ساتھ صحیح عقائد اور اصول ایمان جن پر اعتقاد رکھنا اور ایمان لانا واجب ہے۔وہ سب باتیں قریبا اس کتاب میں مذکو ر ہیں ۔
( التنبيهات اللطيفة ص (13)
قال شيخنا الشيخ ابن عثيمين رحمه الله – وهو يوصي ببعض الكتب المهمة : كتاب (العقيدة الواسطية)، وتتضمن توحيد الأسماء والصفات، وهى من أحسن ما ألف فى هذا الباب، وهى جديرة بالقراءة والمراجعة۔
شیخ ابن باز رحمہ اللہ کہتے ہیں “عقیدہ کی اہم کتابوں میں سے شیخ الاسلام کی لکھی ہوئ کتاب” عقیدہ واسطیہ “بھی ہے ،مختصر ہونے کے باجود عظیم فائدہ کی حامل یہ کتاب ہے ،جس میں اجمالا اہل سنت والجماعت کے عقائد بیان کئے گئے ہیں ۔
(مجموع فتاوى ابن باز (27/ 396)
قال شيخنا الشيخ ابن عثيمين رحمه الله – وهو يوصي ببعض الكتب المهمة: كتاب (العقيدة الواسطية)، وتتضمن توحيد الأسماء والصفات، وهى من أحسن ما ألف فى هذا الباب، وهى جديرة بالقراءة والمراجعة
شیخ ابن عثیمین رحمہ اللہ بعض اہم کتابوں کی نصیحت کے ضمن میں عقیدہ واسطیہ کا ذکر کرتے ہیں ، مزید کہتے ہیں ی ا س کتاب میں اسماء و صفات کا بھی بیان ہے ،اور اس باب میں لکھی گئ کتابوں میں سے عمدہ ترین کتاب ہے ،پڑھنے اور مراجعہ کے لئے لائق ہے ۔
(مجموع فتاوى ورسائل العثيمين (26/341)، وكتاب العلم له ص (70).
جاء فى فتاوى اللجنة الدائمة ۔أما كتاب (العقيدة الواسطية) فهو كتاب جليل مشتمل على بيان عقيدة أهل السنة والجماعة بالأدلة من الكتاب والسنة، فنوصيك باعتقاد ما فيه والدعوة إلى ذلك۔
جہاں تک بات ہے عقیدہ واسطیہ کی تو یہ وہ کتاب ہے جس کے اندر کتاب و سنت کی روشنی میں اہل سنت والجماعت کے عقائد کو بیان کیاگیا ہے ،اس وجہ سے ہم وصیت کرتے ہیںکہ اس کے اندر موجود باتوں پر اعتقادرکھا جائے اور ان باتوں کی طرف دعوت دی جائے ۔
(فتاوى اللجنة الدائمة:(2/242)
تعارف کتاب اور اس کے اساسی موضوعات
شیخ الاسلام کی یہ کتاب بھی ان کتابوں میں سے ایک ہے جسے شیخ الاسلام نے ایک ہی بیٹھک (مجلس)میں مکمل کیاہے۔عقیدہ کے باب میں لکھی گئ بہت کم کتابوں کو یہ مقام ملا ہے کہ علماء نے اس کے ضبط کلمات ،مراجعہ ،تحقیق و تعلیق اور شرح کی طرف اتنا توجہ دی ہو ۔
بعض طلبہ کا یہ خیال کرنا کہ یہ کتاب صرف صفات کے مسائل پر مشتمل ہے ،یہ بالکل غلط ہے ،دراصل اس طرح کا خیال ان کے اندر اس وجہ سے آتا ہوگا چونکہ کتاب کی شروعات اسی باب سے ہوتی ہے حالانکہ آگے کئ ایک ابواب اور ہیں ،جن میں مختلف عقیدہ کے مسائل بیان کئے گئے ہیں ۔یہ کتاب عقیدے کے اساسی آٹھ ابواب پر محیط ہے ۔اسماء و صفات ،اہل سنت والجماعت کی وسطیت ،یوم آخرت،قدر کا مسئلہ ،ایمان کا مسئلہ ،صحابہ اور اہل بیت ،اولیاء کے کرامات ،سلوک و عمل میں اہل سنت کا طریقہ۔(شرح العقيدة الواسطية – عبد الرحيم السلمي (1/ 9)
فوائد علمیہ
1-اللہ رب العالمین کی صفات پر ویسے ہی ایمان لانا ہے ،جیسا کہ اس نے بیان کیاہے ۔ اس کی چند صفات جیسے علیم ،قدیر ،سمیع ،حکیم وغیرہ ۔
2-رحمن کے عرش پر مستوی ہونے سے متعلق شیخ الاسلام نے سات دلائل ذکر کئے ہیں ۔ [الأعراف:54]
[يونس:3] [الرعد:2] [طه:5] [الفرقان:59] [السجدة:4] [الحديد:4]
3-اللہ رب العالمین کی معیت بندوں کے ساتھ حقیقتا ہے نہ کہ کنایتا ۔معیت کے حوالہ سے دلائل بھی شیخ الاسلام نے ذکر کئے ہیں ۔
4-اللہ رب العالمین کی ایک صفت “صفت کلام ” بھی ہے ۔ شیخ الاسلام نے اس حوالہ سے کئ ایک دلیلیں قرآ ن سے پیش کی ہیں ۔
5-کل قیامت کے دن مؤمنین اللہ رب العالمین کا دیدار کریں گے ، کئ ایک دلیلیں ذکر کرنے کے بعد شیخ الاسلام کہتے ہیں کہ اس باب بے شمار نصوص موجو دہیں ۔
6-اللہ رب العالمین ہر رات آسمان دنیا کی طرف نزول فرماتا ہے ۔
7-اللہ رب العالمین کی من جملہ صفات میں سے صفت فرح اور صفت ضحک بھی ہے۔
8-حالت صلاہ میں قبلہ کی جانب تھوکنے سے منع کیا گیا ہے ،کیونکہ اس وقت بندہ اللہ رب العالمین کے سامنے ہوتا ہے اور یہ چیز اللہ کے صفت علو کے منافی نہیں ہے ۔
9-حدیث قرآن کریم کی تفسیر ہے ،اللہ رب العالمین کے اسماء وصفات کے حوالہ سے حدیث سے جو بھی باتیں ثابت ہیں ،ان پر بھی ایمان لانا واجب ہے۔
10-اہل سنت والجماعت خوراج کی طرح مطلق مرتکب کبیرہ یا عمومی معصیت کے مرتکب کی تکفیر نہیں کرتے ہیں ۔بلکہ اہل سنت والجماعت معصیت کے مرتکب کے ایمانی اخوت کو برقرار رکھتے ہیں ۔
11-صحابہ کرام کے حوالہ سے اہل سنت والجماعت کا عقیدہ ہے کہ ہمارے دل وزبان دونوں سے وہ مامون ہوں ۔اور ان تمام لوگوں سے برات کا اظہار کرتے ہیں جو صحابہ سے بغض رکھتے ہیں۔
12-اہل سنت والجماعت کے اصول میں سے ہے کہ نبی صلی اللہ علیہ وسلم کی پیروی کی جائے ۔
شروحات ،حواشی ،تعلیقات اورتحقیقات
1-العقيدة الواسطية ،المحقق: أبو محمد أشرف بن عبد المقصود
2-التنبيهات اللطيفة فيما احتوت عليه الواسطية من المباحث المنيفة-
تأليف العلامة عبد الرحمن بن ناصر السعدي، وعليها منتخبات من تقارير الشيخ عبد العزيز بن عبد الله بن باز
3-العقيدة الواسطية-علَّق على حواشيها وأشرف على تصحيحها فضيلة العلاّمة محمد بن عبد العزيز بن مانع
4-شرح العقيدة الواسطية-للعلاَّمة محمد خليل هرَّاس ـوراجعه الشيخ عبد الرزاق عفيفي
5-التَّنبيهات السنيَّة على العقيدة الواسطية-للشيخ عبد العزيز الناصر الرشيد
6-الكواشف الجليَّة عن معاني الواسطية-للشيخ عبد العزيز المحمد السلمان
7-مختصرالأسئلة والأجوبة الأصولية على العقيدة الواسطية-المؤلف: أبو محمد عبد العزيز بن محمد بن عبد الرحمن بن عبد المحسن السلمان (ت 1422هـ)
8-شرح العقيدة الواسطية-للشيخ صالح بن فوزان الفوزان
9-العقيدة الواسطية-للعلاّمة محمد بن صالح العثيمين
10-التعليقات المفيدة على العقيدة الواسطية-تعليق وتخريج عبد الله بن عبد الرحمن بن على الشريف
11-العقيدة الواسطية ومجلس المناظرة فيها بين شيخ الإسلام ابن تيمية وعلماء عصره،تحقيق الأستاذ/ زهير الشاويش
12-شرح العقيدة الواسطية،للشيخ سعيد بن على بن وهف القحطاني، راجعه له الشيخ الدكتور عبد الله بن عبد الرحمن الجبرين
13-الروضة النديَّة شرح العقيدة الواسطية،للشيخ زيد بن عبد العزيز بن فياض
14-التعليقات الزكية على العقيدة الواسطية،للشيخ عبد الله بن عبد الرحمن الجبرين
15-شرح العقيدة الواسطية من كلام شيخ الإسلام ابن تيمية،جمع وترتيب الأخ خالد بن عبد الله المصلح15-شرح العقيدة الواسطية من كلام شيخ الإسلام ابن تيمية،جمع وترتيب الأخ خالد بن عبد الله المصلح
اس کے علاوہ کئ ایک اور شرحیں ہیں ،دیکھیں ۔
(كتاب التحفة الندية شرح العقيدة الواسطية – عبد الرحمن العقل ۔ص21-24)
اردو تراجم:
1-شرح عقیدہ واسطیہ ترجمہ پروفیسر جارو اللہ ضیاء حفظہ اللہ (دراصل یہ محمد بن صالح العثیمین کی شرح کا ترجمہ ہے )
2-صحیح اسلامی عقائد مترجم جاوید عمری مدنی مراجعہ ساجد اسید ندوی
3- شرح عقیدہ واسطیہ سؤالاو جوابا مترجم محمد اختر صدیق
4-عقیدہ اہل سنت و الجماعت شارح خلیل ہراس مترجم محمد صادق خلیل رحمہ اللہ
5-شرح عقیدئ واسطیہ شارح سعید بن وہب القحطانی مترجم عنایت اللہ بن حفیظ اللہ سنابلی مدنی
6-عقیدہ واسطیہ مترجم ابو المکرم عبد الجلیل
7-شرح عقیدئ واسطیہ شارح عبد العزیز بن عبد اللہ بن باز رحمہ اللہ تعلیقات و حواشی محمد بن صالح العثیمین وعبد اللہ بن عبدالرحمان الجبرین رحمہ اللہ ترجمہ و تخریج محمد زبیر شیخ حفظہ اللہ ۔
نیا شمارہ
