Vbet Online Cassino Brasil

 اسی طرح علمائے متقدمین ومتأخرین کی ایک بہت بڑی جماعت نے مالداروں کے لئے اس نفلی صدقہ کے استعمال کو جائز کہا ہے۔ ذیل میں بعض فتاوے ملاحظہ فرمائیں:

الف ۔  ابو الولید الباجی فرماتے ہیں:

’’أما صدقة التطوع فتعطي لكل أحد من غني وفقير‘‘

’’جہاں تک نفلی صدقہ کا مسئلہ ہے تو یہ مالدار وفقیر سب کو دیا جائے گا‘‘[المنتقی شرح المؤطا:۷/۳۲۰]

ب۔ ابن حزم فرماتے ہیں:

’’والصدقة للتطوع على الغني جائزة وعلي الفقير‘‘

’’مالدار کو نفلی صدقہ دینا جائز ہے اور فقیر کوبھی‘‘[المحلی:۸/۱۲۴]

ج۔  ابو بکر علاء الدین السمرقندی (ت ۵۴۰ھ)فرماتے ہیں:

’’أما صدقة التطوع فيجوز صرفها إلى الغني وتحل له وتكون بمنزلة الهبة له‘‘

 ’’جہاں تک نفلی صدقہ کا معاملہ ہے تو اسے مالدار کو دینا جائز ہے۔ اور مالدار کے لئے وہ حلال بھی ہوگا، اور یہ اس کے لئے ہبہ کی مانند ہوگا‘‘[تحفۃ الفقہاء :ص:۳۰۱]

د۔  کاسانی فرماتے ہیں:

’’وأما صدقة التطوع فيجوز صرفها إلى الغني؛ لأنها تجري مجري الهبة‘‘

’’اور نفلی صدقہ تو اسے مالدار کو دینا جائز ہے، کیونکہ یہ ہبہ کے قائم مقام ہے‘‘[بدائع الصنائع:۲/۴۷]

ح۔ ابن قدامہ فرماتے ہیں:

’’وكل من حرم صدقة الفرض من الأغنياء وقرابة المتصدق والكافر وغيرهم، يجوز دفع صدقة التطوع إليهم، ولهم أخذها‘‘

’’ہر وہ شخص جن کے لئے فرض صدقہ حرام ہے جیسے مالدار، صدقہ کرنے والے کا قریبی رشتے دار، کافر وغیرہ انہیں نفلی صدقہ دینا جائز ہے، اور ان کے لئے قبول کرنا بھی جائز ہے‘‘[المغنی:۲/۴۹۲]

و۔  ان کے علاوہ بھی ابن عبد البر،امام نووی اور حافظ ابن حجر رحمہم اللہ وغیرہم کے اقوال اوپر گزر چکے ہیں، اور اس طرح کے دیگر علماء کے فتاوے بہت ہیں۔ اس کے بالمقابل خاکسار کو متقدمین یا متأخرین علما ء میں سے کسی کا قول نہیں ملا جنہوں نے مالداروں کے لئے اس نفلی صدقہ کو ناجائز کہا ہو۔

البتہ اس مسئلہ میں بعض ایسے اشکالات ہیں جن سے کسی کو یہ وہم یا غلط فہمی ہو سکتی ہے کہ مالداروں کے لئے نفلی صدقہ جائز نہیں۔ ذیل میں ان اشکالات کا ازالہ کیا جارہا ہے اور ان کا مختصرا ًجائزہ پیش کیا جارہا ہے۔

۱۔   صدقہ کے حقدار نادار محتاج لوگ ہیں، نہ کہ اہل دولت وثروت۔   نبی ﷺ نے فرمایا:

’’تؤخذ من أغنياء هم فترد علٰي فقراء هم‘‘

جائزہ:  اس حدیث میں جس صدقہ کا حقدار فقراء ومساکین کو کہا گیا ہے وہ نفلی صدقہ نہیں ہے، بلکہ بالاتفاق فرض  زکات ہے جو کہ اسلام کا ایک رکن ہے۔ جس کے لئے نصاب متعین ہے، اور جس کا کھانا مالداروںکے لئے بالاجماع جائز نہیں۔ یہ در اصل حدیث معاذ کا ایک ٹکڑا ہے، اور حدیث معاذ میں بالکل واضح ہے کہ آپ ﷺ نے انہیں ارکان اسلام کی تعلیم دی تھی اور اہل یمن کے مابین اس کی نشر واشاعت کا حکم دیا تھا۔ 

لہٰذا زکات کے مصرف میں وارد شدہ حدیث سے نفلی صدقہ کا بھی مالداروں کے لئے حرام ہونے پر استدلال کرنا قطعاً صحیح نہیں۔ 

۲۔   ایک آدمی نے رات کی تاریکی میں ایک مالدار کو صدقہ دے دیا تو کہا گیا:’’تصدق علی غنی‘‘ یہ تعجب اس بات کی دلیل ہے کہ وہ مستحق نہ تھا اسی لئے تو اسے دینے پر اظہار تعجب کیا گیا ۔

جائزہ:

الف ۔  مذکورہ جملہ ابو ہریرہ رضی اللہ عنہ کی قدرے طویل حدیث کا ایک مختصر ٹکڑا ہے۔ پوری حدیث اس طرح ہے:  آپ ﷺ نے فرمایا: ’’ایک شخص نے کہا:مجھے ضرور صدقہ دینا ہے، پس وہ اپنا صدقہ لے کر نکلا اور ایک چور کو اپنا صدقہ دے دیا، صبح ہوئی تو لوگوں نے کہنا شروع کیا کہ آج کسی نے چور کو صدقہ دے دیا۔ اس شخص نے کہا:اے اللہ تمام تعریفیں تیرے ہی لئے ہیں۔ آج مجھے پھر ضرور صدقہ کرنا ہے۔ چنانچہ وہ دوبارہ صدقہ لے کر نکلا اور ایک فاحشہ کے ہاتھ میں تھما دیا۔ جب صبح ہوئی تو پھر چرچا ہوا کہ آج رات کسی نے فاحشہ عورت کو صدقہ دے دیا۔ اس شخص نے کہا: اے اللہ تمام تعریفیں تیرے ہی لئے ہیں، میں زانیہ کو صدقہ دے آیا۔ اچھا آج پھر صدقہ کروں گا ، پھر اپنا صدقہ لے کر نکلا اور ایک مالدار کے ہاتھ میں دے آیا۔ صبح پھر لوگوں نے کہنا شروع کیا کہ آج کسی نے ایک مالدار کو اپنا صدقہ دے دیا ہے۔ اس شخص نے کہا:اے اللہ تمام تعریفیں تیرے ہی لئے ہیں، میں چور، زانیہ اور مالدار کو اپنا صدقہ دے آیا۔ اسے کہا گیا:تم نے جو چور کو صدقہ دیا ہے ہو سکتا ہے اس سے وہ چوری سے رک جائے۔ زانیہ ہو سکتا ہے زنا سے رک جائے، اور مالدار ہو سکتا ہے عبرت پکڑے اور اللہ تعالیٰ نے جو اسے مال دیا ہے اس سے خرچ کرنے لگے۔ [صحیح بخاری:۱۴۲۱، وصحیح مسلم:۱۰۲۲]

یہاں صدقہ کرنے والے نے تین لوگوں کو اپنے صدقے کا مال دیا اور تینوں پر اظہار تعجب کیا گیا۔سوال یہ ہے کہ یہ اظہار تعجب کیا حرمت کی دلیل ہے؟

اگر اسے حرمت کی دلیل مان لیا جائے تو چور اور زانیہ کو صدقہ کا مال دینا بھی حرام قرار پائے گا حالانکہ اس کا کوئی قائل نہیں۔

علامہ ابن بطال المالکی رحمہ اللہ (متوفی۴۴۹ھ)فرماتے ہیں:

’’أما الصدقة على السارق والزانية، فإن العلماء متفقون أنهما إن كانا فقيرين فهما ممن تجوز له الزكاة‘‘

’’جہاں تک چور اور زانیہ کو صدقہ دینے کا مسئلہ ہے تو علما ء اس بات پر متفق ہیں کہ اگر دونوں فقیر ہوں تو ان کے لئے زکوٰۃ جائز ہے‘‘[شرح صحیح البخاری لابن بطال:۳/۴۲۳]

اور اسی طرح کا اتفاق ابن الملقن نے بھی اپنی صحیح بخاری کی شرح میں نقل کیا ہے۔دیکھیں:[التوضیح :۱۰/۳۰۰]

 لہٰذا اس حدیث میں اس بات کی دلیل نہیں ہے کہ مالدار کو صدقہ کا مال دینا حرام ہے۔ ہاں زیادہ سے زیادہ اس کا سیاق خلاف اولیٰ کی طرف اشارہ کرتا ہے۔ 

 ب۔    اگر کوئی اس سے مالدار کو نفلی صدقہ دینے کی حرمت پر استدلال کرنا بھی چاہے پھر بھی اس کا یہ استدلال صحیح نہ ہوگا کیونکہ یہ حدیث نفلی صدقہ کے سلسلے میں نہیں ہے، بلکہ اس میں واجب صدقہ کی بات کی گئی ہے۔ اور واجب صدقہ کا مالدار کے لئے حرام ہونے پر کوئی کلام نہیں۔ (یہ الگ بات ہے کہ خصوصی طور پر اس حدیث کا سیاق حرمت پر دلالت نہیں کرتا، اس کی حرمت کے دلائل دوسرے ہیں، یہ حدیث نہیں۔)

جو اس حدیث کو نفلی صدقہ پر محمول کرتے ہیں ان پر رد کرتے ہوئے علامہ ابن الملقن رحمہ اللہ فرماتے ہیں:

’’وزعم بعضهم أن هذا كان فى صدقة التطوع‘‘

’’بعض لوگوں کا گمان ہے کہ یہ واقعہ نفلی صدقے کا تھا‘‘ [التوضیح:۱۰/۳۰۱]

دیگر شارحین نے بھی اسے واجب صدقہ پر محمول کرتے ہوئے یہ بحث کی ہے کہ فرض زکات اگر کسی غیر مستحق کو دے دی جائے تو وہ زکات دینے والے کی طرف سے کافی ہوگا یا نہیں۔ لہٰذا اس سے نفلی صدقہ پر استدلال بالکل درست نہیں۔ واللہ اعلم۔

۳۔  اللہ تعالیٰ نے واضح طور سے صدقہ کو مسکینوں کا ہی حق قرار دیا ہے۔ فرمایا:

’’” إن تبدو الصدقات فنعما هي وإن تخفوها وتؤتوها الفقراء فهو خير لكم‘‘، اور اس میں نفلی صدقہ کی بات کی گئی ہے۔

جائزہ:  اس آیت میں بھی مالداروں کو نفلی صدقہ دینے کے عدم جواز پر کوئی دلیل نہیں ہے۔ اس میں افضل مصرف کی طرف رہنمائی ہے بس، اس سے زیادہ کچھ نہیں۔ اور اس میں کوئی شک نہیں کہ اپنا نفلی صدقہ کسی فقیر اور محتاج کو دینا کسی مالدار کو دینے کی بنسبت زیادہ بہتر ہے ۔ 

امام نووی رحمہ اللہ فرماتے ہیں:

’’تَحِلُّ صَدَقَةُ التَّطَوُّعِ لِلْأَغْنِيَاء ِ بِلَا خِلَافٍ فَيَجُوزُ دَفْعُهَا إلَيْهِمْ وَيُثَابُ دَافِعُهَا عَلَيْهَا وَلَكِنَّ الْمُحْتَاجَ أَفْضَلُ‘‘

’’مالداروں کے لئے بلا اختلاف نفلی صدقہ حلال ہے، لہٰذا انہیں نفلی صدقہ دینا جائز ہے، اور دینے  والا ثواب کا حقدار ہوگا، لیکن حاجت مند کو دینا بہتر ہے‘‘[المجموع شرح المہذب:۶/۲۳۹]

۴۔   صدقہ اور ہدیہ میں فرق کیا گیا ہے:’’ھو علیھا صدقۃ ولنا ھدیۃ‘‘

جائزہ:  اس حدیث میں جس صدقہ کی بات کی گئی ہے وہ نفلی صدقہ نہیں، بلکہ اس سے مراد زکات ہے، کیونکہ آپ ﷺ اور آپ کے آل پر زکات حرام تھی، نفلی صدقہ نہیں۔

حدیث:’’لا تحل الصدقۃ لآل محمد‘‘

’’آل محمد کے لئے صدقہ حلال نہیں‘‘کی شرح کرتے ہوئے ابن قاسم المالکی فرماتے ہیں: