Vbet Online Cassino Brasil

زکاۃ اسلام کا تیسرا رکن ہے، جسے معاشرے کے غریب، محتاج، ضرورت مند اور پریشان حال لوگوں کے تعاون کیلئے فرض کیا گیا ہے، زکاۃ کا مال کہاں خرچ کرنا ہے اور کس قسم کے لوگوں کو دینا ہے اس کی رہنمائی سورہ توبہ کی آیت نمبر۶۰کی گئی ہے۔
بسا اوقات ایسا ہوتا ہے کہ بعض لوگ خود سے اپنی زکاۃ غریبوں کے درمیان تقسیم نہیں کر سکتے، ایسی صورت میں وہ کسی کو اپنا نائب بنا دیتے ہیں تاکہ وہ زکاۃ کا مال غریبوں اور فقراء تک پہنچا دے، اس نائب کی ذمہ داری یہی ہے کہ وہ اس مال کو فقراء و محتاجین تک ویسے ہی پہنچا دے جیسے اسے دیا گیا ہے، اس میں کوئی تصرف نہ کرے، مثال کے طور پر: کسی نے ایک شخص کو 10000 زکاۃ کے روپے دئیے کہ وہ غریبوں کے درمیان تقسیم کر دے، اب اس کی ذمہ داری بنتی ہے کہ وہ غریبوں میں روپیہ ہی تقسیم کرے، اپنی صواب دید سے چاول، گیہوں، آٹا، تیل، چینی، مصالحہ، اور دیگر اشیاء خوردنی خرید کر غریبوں کو نہ دے، کیونکہ زکاۃ کا مال صرف غریبوں کی ملکیت ہے، اور ان غریبوں سے پوچھے بنا ان کی ملکیت میں تصرف کرنا جائز نہیں ہے، نیز ان غریبوں کو پتہ ہے کہ ان کی مصلحت کھانے پینے کی چیز خریدنے میں ہے یا پھر دوسری چیزوں میں؟
امام بقاعی رحمہ اللہ کہتے ہیں:’’زکاۃ غریبوں کے ہاتھوں میں دینا چاہیے، فقراء و مساکین اپنی مرضی سے جیسے چاہیں اس زکاۃ کے مال کو خرچ کریں یا اس میں تصرف کریں‘‘[نظم الدرر :۸؍۵۰۵]
امام مرداوی رحمہ اللہ کہتے ہیں:’’زکاۃ کا مال غریبوں کی ملکیت میں تحویل کرنا شرط ہے، زکاۃ کے مال سے انہیں کھانا وغیرہ کھلانا جائز نہیں‘‘[الإنصاف:۳؍۲۳۴]
شیخ البانی رحمہ اللہ فرماتے ہیں:زکاۃ دینے کی شرطوں میں سے ایک شرط یہ ہے کہ زکاۃ کے پیسے فقراء اور مساکین کے ہاتھ میں دئیے جائیں، وہ جیسے چاہیں زکاۃ کے پیسوں کا استعمال کریں، ان پیسوں سے فقیروں کی دوسری ضروریات پوری کرنا جائز نہیں ہے، اور یہی بات کتاب و سنت کے نصوص سے ثابت ہوتی ہے۔

شیخ ابن عثیمین رحمہ اللہ سے پوچھا گیا:کیا زکاۃ کے مال سے فقراء و مساکین کو ماہ رمضان میں افطار کروایا جا سکتا ہے؟
شیخ ابن عثیمین رحمہ اللہ نے جواب دیا: زکاۃ کے مال سے فقراء و مساکین کو افطار کروانا جائز نہیں ہے، بلکہ زکاۃ کا مال فقراء اور مساکین کو دینا واجب ہے، وہ اپنی ضرورت و مصلحت کے مطابق زکاۃ کا مال استعمال کریں گے، ہر صورت میں فقراء و مساکین کو زکاۃ کا مال ہی دینا ہے، ان کی مرضی ہے وہ اپنے مال کو جہاں چاہیں خرچ کریں (زکاۃ کے مال سے کھانے پینے کی اشیاء یا دیگر چیزیں خرید کر دینا جائز نہیں) جیسا کہ اللہ رب العالمین نے فرمایا: {إِنَّمَا الصَّدَقَاتُ لِلْفُقَرَائِ……} الآیۃ:۶۰
(لِلْفُقَرَاء) میں لام تملیک کیلئے ہے، یعنی زکاۃ کا مال ان فقراء کی ملکیت ہے (دوسرے لوگ ان کے مال میں بایں طور تصرف نہیں کر سکتے)[لقاء الباب المفتوح:۵۰؍،ص:۱۴]
شیخ ابن عثیمین رحمہ اللہ سے سوال کیا گیا:کیا زکاۃ کے پیسوں سے اشیاء خوردنی خرید کر غریبوں میں تقسیم کی جا سکتی ہے؟
شیخ ابن عثیمین رحمہ اللہ نے کہا:ایسا کرنا جائز نہیں ہے، غریبوں کو پیسہ ہی دیا جائے گا، (ان پیسوں سے دوسری چیز خرید کر نہیں دی جائے گی) [اللقاء الشہری:۳۴؍۴۱]
ایک مقام پر شیخ ابن عثیمین رحمہ اللہ نے فرمایا: پیسوں کی زکاۃ صرف پیسوں میں ہی نکالی جائے گی، ان پیسوں سے دوسری چیزیں خرید کر فقراء و مساکین کو دینا جائز نہیں ہے، اگر خود فقراء و مساکین کسی کو اپنا وکیل یا نائب بنا کر انہیں اپنے زکاۃ کے پیسے دے کر کوئی دوسری چیز خریدنے کیلئے کہیں تو ایسا کرنا جائز ہے۔ [مجموع فتاوی ورسائل ابن عثیمین:۱۸؍۳۰۳]
محترم قارئین: مندرجہ بالا سطور سے یہ بات واضح ہو جاتی ہے کہ زکاۃ کا مال فقراء و مساکین کا ہے، ان سے پوچھے بنا اس میں تصرف کرنا کسی کیلئے جائز نہیں ہے، کیونکہ شریعت نے زکاۃ کے مال کا حقدار فقراء و مساکین کو بنایا ہے، اور کسی کے مال میں اس کی مرضی کے بنا کسی بھی قسم کاتصرف جائز نہیں ہے۔
نیز جس طرح زکاۃ نکالنے والوں کے پاس سمجھ اور فہم ہے اسی طرح زکاۃ لینے والوں کے پاس بھی سمجھ اور فہم ہے، جس طرح زکاۃ نکالنے والا اپنی ضرورت اور مصلحت کو خود بہتر جانتا ہے اسی طرح زکاۃ لینے والے فقراء و مساکین بھی اپنی مصلحت و ضرورت کو دوسرے کے مقابلے میں بہتر طور پر جانتے ہیں، اس لئے زکاۃ کا مال فقراء و مساکین کے ہاتھ میں ہی دیا جائے، نہ کہ زکاۃ کے پیسوں سے دیگر اشیاء خرید کر ان غریبوں کو تھما دیا جائے۔
بعض علماء کرام نے بعض فقراء و مساکین کی مصلحت کے پیش نظر زکاۃ کے مال سے ان کی ضرورت کی چیزیں خرید کر انہیں دینے کی اجازت دی ہے، جیسے:کوئی فقیر پاگل ہو، یاکم عقل ہو، یا پیسے خرچ کرنے کا طریقہ نہیں جانتا ہو تو اس قسم کے فقراء و مساکین کیلئے زکاۃ کے پیسوں سے ان کی ضرورت کی چیزیں خریدی جا سکتی ہیں۔[مجلۃ البحوث الإسلامیۃ:۵۹؍۸۷]