Vbet Online Cassino Brasil

أبو سَعِيد الخُدْرِيّ رَضِيَ اللّٰهُ عَنْهُ، يَقُولُ:’’كُنَّا نُخْرِجُ زَكَاةَ الفِطْرِ صَاعًا مِنْ طَعَامٍ، أَوْ صَاعًا مِنْ شَعِيرٍ، أَوْ صَاعًا مِنْ تَمْرٍ، أَوْ صَاعًا مِنْ أَقِطٍ، أَوْ صَاعًا مِنْ زَبِيبٍ‘‘۔
ابو سعید خدری رضی اللہ عنہ فرماتے تھے کہ:’’ ہم فطرہ کی زکوٰۃ ایک صاع اناج یا گیہوں یا ایک صاع جَو یا ایک صاع کھجور یا ایک صاع پنیر یا ایک صاع زبیب (خشک انگور یا انجیر) نکالا کرتے تھے‘‘۔
[صحیح البخاری:۱۵۰۶]
ابوسعید الخدری رضی اللہ عنہ کی اس حدیث کی ابتداء میں جو’’ صَاعًا مِنْ طَعَامٍ‘‘کے الفاظ ہیں اس سے کچھ لوگوں نے یہ سمجھ لیا کہ ابوسعید الخدری رضی اللہ عنہ نے ان الفاظ میں عام غلوں کومراد لیا ہے پھر اسی غلط فہمی کی بنیاد پر یہ کہہ دیا گیا کہ فطرہ میں عام غلے دینا حدیث سے صراحتاً ثابت ہے ۔
دراصل ان حضرات کا کہنا یہ ہے کہ’’ صَاعًا مِنْ طَعَامٍ ‘‘ کے بعد اداۃ عطف ’’أَوْ ‘‘آیا ہے اس کے بعد چار چیزیں بیان ہوئی ہیں اور’’ أَوْ ‘‘یہ مغایرت پر دلالت کرتا ہے لہٰذا پتہ چلا کہ’’ صاعاً من طعام ‘‘ ان چیزوں کے علاوہ ہے جن کا ذکر اداۃ عطف ’’أَوْ ‘‘کے بعد ہے۔
عرض ہے کہ عطف ہمیشہ مغایرت پر دلالت نہیں کرتا ہے بلکہ عطف کی ایک قسم عطف تفسیری بھی ہے۔یعنی ایک چیز کو اجمالی طور پر ذکر کردیا جائے پھر اس کے بعد اداۃ عطف کے ذریعہ اس کی تفصیل وتشریح کی جائے۔یہی معاملہ یہاں بھی ہے یعنی شروع میں ’’ صاعاً من طعام ‘‘ کے اجمالی بیان کے بعد جو اداۃ عطف ’’أَوْ ‘‘ہے وہ تفسیری ہے ، اس کے دلائل درج ذیل ہیں:
اولاً:
ابوسعید الخدری رضی اللہ عنہ نے ابتداء میں اجمالی طور پر’’ صاعاً من طعام ‘‘ کہا ہے اور بعد میں اسی اجمال کی تفصیل کرتے ہوئے چار چیزوں کا ذکر کیا ہے۔جیساکہ درج ذیل حدیث میں بالکل وضاحت ہے:
عن أبي سعيد الخدري رضي اللّٰه عنه، قال:’’كنا نخرج فى عهد رسول اللّٰه صلى اللّٰه عليه وسلم يوم الفطر صاعا من طعام، وقال أبو سعيد:وكان طعامنا الشعير والزبيب والأقط والتمر‘‘۔
صحابی رسول ابو سعید خدری رضی اللہ عنہ نے بیان کیا کہ:’’ہم نبی کریم ﷺکے زمانہ میں عیدالفطر کے دن ایک صاع طعام نکالتے تھے۔ ابوسعید رضی اللہ عنہ نے بیان کیا کہ ہمارا طعام (ان دنوں) جَو، زبیب، پنیر اور کھجور تھا‘‘۔
[صحیح البخاری:۲؍۱۳۱،رقم۱۵۱۰]
اس حدیث میں ابوسعید الخدری رضی اللہ عنہ نے مجمل طعام کی تفسیر و تفصیل بیان کردی کہ عہد رسالت میں فطرہ میں نکالا جانے والا طعام چار قسم کا ہوتا تھا۔لہٰذا جب حدیث کی تشریح خود حدیث سے ہی ہوگئی تو کسی اور رخ پربحث کی سرے سے گنجائش ہی باقی نہ بچی۔
بعض لوگوں نے اس حدیث میں مذکور مجمل طعام کو بعد میں مذکور طعام سے الگ مانا تو ان پر ابن المنذر رحمہ اللہ نے رد کیا جسے نقل کرتے ہوئے حافظ ابن حجر رحمہ اللہ (المتوفی۸۵۲) فرماتے ہیں:
’’وقد رد ذلك بن المنذر وقال ظن بعض أصحابنا أن قوله فى حديث أبي سعيد صاعا من طعام حجة لمن قال صاعا من حنطة وهذا غلط منه وذٰلك أن أبا سعيد أجمل الطعام ثم فسره ثم أورد طريق حفص بن ميسرة المذكورة فى الباب الذى يلي هذا وهى ظاهرة فيما قال ولفظه كنا نخرج صاعا من طعام وكان طعامنا الشعير والزبيب والأقط والتمر ‘‘۔
’’ ابن المنذر نے اس بات کی تردید کرتے ہوئے کہا کہ ہمارے بعض اصحاب نے یہ گمان کرلیا کہ ابوسعید الخدری رضی اللہ عنہ کی حدیث میں مذکور ’’صاعاً من طعام‘‘ کے الفاظ ان لوگوں کے لیے دلیل ہیں جو کہتے ہیں کہ فطرہ میں ایک صاع گیہوں نکالا جائے گا۔جبکہ یہ بات غلط ہے کیونکہ ابوسعید الخدری رضی اللہ عنہ نے پہلے طعام کو اجمالی طور پر ذکر کیا ہے اور بعد میں اس کی تفسیر وتفصیل بیان کردی ہے ۔پھر ابن المنذر نے حفص بن میسرۃ کے طریق والی روایت ذکر کی ہے جس کا ظاہر ابن المنذر ہی کے موقف پر دلالت کرتا ہے اس کے الفاظ یہ ہیں:ابوسعید رضی اللہ عنہ نے بیان کیا کہ ہمارا طعام (ان دنوں) جَو، زبیب، پنیر اور کھجور تھا‘‘۔
[فتح الباری لابن حجر :۳؍۳۷۳]
صحیح بخاری کے ایک دوسرے شارح امام قسطلانی (المتوفی۹۲۳)بھی ابن المنذر کی تائید کرتے ہوئے فرماتے ہیں :
’’زاد الطحاوي من طريق أخري عن عياض فلا نخرج غيره، وهو يؤيد تغليط ابن المنذر لمن قال إن قوله صاعًا من طعام حجة لمن قال صاعًا من حنطة ‘‘۔
’’ امام طحاوی نے عیاض کے واسطے ایک دوسرے طریق سے یہ اضافہ بیان کیا ہے کہ (ابوسعید الخدری رضی اللہ عنہ نے کہا کہ) ہم ان چیزوں (جن کاذکر صراحت کے ساتھ کیا ہے ان) کے علاوہ کسی اور چیز سے فطرہ نہیں نکالتے تھے۔ یہ حدیث ابن المنذر اس بات کی تائید کرتی ہے جس میں انہوں نے ان لوگوں کو غلط قرار دیا ہے جو ’’صَاعًا مِنْ طَعَامٍ‘‘ سے ایک صاع گیہوں دینے کی دلیل لیتے ہیں‘‘۔
[إرشاد الساری لشرح صحیح البخاری:۳؍۸۹]
محمود عبد اللطیف عویضۃ صاحب لکھتے ہیں:
’’فهذا أبو سعيد الخدري نفسه الذى رُوي حديثهم من طريقه، قد فسَّر لفظة الطعام تفسيراً يقطع الشك باليقين، بأن معناها عندهم الشعير والزبيب والأقط والتمر، أى الأصناف ذاتها الواردة فى حديثهم عقب لفظة الطعام، والحديث يفسِّر بعضه بعضاً، وعليه فإِنَّا نَحْمِلُ حديثَهم علٰي هذا الحديث، فنقول إن هذا الحديث قد ذكر العامَ، ثم ذكر بعده الخاص، وهذا أسلوب يعرفه الكل‘‘۔
’’ابوسعید الخدری رضی اللہ عنہ جن کے طریق سے فطرہ سے متعلق طعام والی حدیث منقول ہے انہوں نے خود لفظ طعام کی ایسی تفسیر کردی ہے جس سے شکوک وشبہات ختم ہوجاتے ہیں اور یقینی طور پر یہ بات معلوم ہوجاتی ہے کہ طعام سے ان کی مراد جو ، کشمش ، پنیر اور کھجور ہی ہے ، یعنی ٹھیک وہی قسمیں جو ان کی حدیث میں لفظ طعام کے بعد مذکور ہیں ، اور بعض حدیث بعض حدیث کی تشریح کرتی ہے ۔ لہٰذا ہم ان کی حدیث کو اس حدیث پرمحمول کریں گے اور کہیں گے کہ اس حدیث میں ابو سعید الخدری رضی اللہ عنہ نے پہلے عمومی طور پر طعام کا ذکر کیا پھر اس کے بعد خصوصی طور پر سب کو بیان کردیا، اس طرح کے اسلوب بیان سے ہر ایک شخص واقف ہے‘‘ ۔
[الجامع لأحکام الصیام :ص:۳۴۱]
ثانیاً:
اس حدیث پر ایک اور پہلو سے غور کریں کہ ابوسعید الخدری رضی اللہ عنہ نے کہا:
’’وكان طعامنا الشعير والزبيب والأقط والتمر‘‘۔
’’ہمارا طعام (ان دنوں) جَو، زبیب، پنیر اور کھجور تھا‘‘۔
[صحیح البخاری:۲؍۱۳۱،رقم۱۵۱۰]
اگر ان کی حدیث میں طعام سے مطلق طعام مراد لیں تو اشکال یہ پیدا ہوتا ہے کہ ابوسعید خدری رضی اللہ عنہ نے یہاں حصر کے ساتھ طعام کی چار قسمیں ہی بتلائی ہیں ، تو سوال یہ ہے کہ کیا ان چار چیزوں کے علاوہ کوئی اور چیز صحابہ کرام کھاتے ہی نہ تھے؟
ظاہر ہے کہ یہ بات خلاف واقعہ ہے کیونکہ یہ ناقابل انکار حقیقت ہے کہ ان چار کے علاوہ بھی کئی اقسام کے کھانے مثلا (اللحم)گوشت ، (السمک)مچھلی ، (الفواکہ)میوے ، (الخضراوات)سبزیاں ، (الذرۃ)مکئی ، (السویق)ستو ، (اللبن)دودھ وغیرہ ان کے یہاں مستعمل تھے۔
لہٰذا یہ سیاق ہی اس بات کی دلیل ہے کہ ابوسعید الخدری رضی اللہ عنہ کا مطلب یہی ہے جس طعام سے وہ فطرہ نکالتے تھے وہ طعام ان چارقسموں پرمشتمل تھا ۔نہ کہ یہ مطلب ہے کہ ان چار چیزوں کے علاوہ کوئی اور چیز وہ کھاتے ہی نہ تھے ۔
ثالثاً:
یہ بات ذہن نشین کی جائے کہ ابوسعید الخدری رضی اللہ عنہ نے اس حدیث میں ’’صَاعًا مِنْ طَعَامٍ‘‘ کے ذریعہ اللہ کے نبی ﷺ کے قول وحکم کو نقل نہیں کیا ہے جو عام ہو اور حال و مستقبل سب کو شامل ہو، بلکہ ان الفاظ سے ابوسعید الخدری رضی اللہ عنہ نے ماضی یعنی عہد رسالت کا عمل (کنا نخرج ہم نکالتے تھے ) بیان کیا ہے اور یہ بتایا ہے کہ ماضی میں یعنی اللہ کے نبی ﷺ کی حیات میں ہم صحابہ یہ چیز نکالتے تھے ۔
اب اگر فرض کرلیا جائے کہ اس حدیث میں’’صَاعًا مِنْ طَعَامٍ‘‘ ان چارچیزوں کے علاوہ ہے جن کا ذکراس کے بعد ہوا ہے تو اس کا مطلب یہ ہوا کہ عہد رسالت میں ان چارچیزوں کے علاوہ بھی دیگر غلوں سے فطرہ دیا جاتاتھا۔ پھرسوال پیدا ہوتا ہے کہ ان چارچیزوں کے علاوہ وہ کون کون سے غلے تھے جو عہدرسالت میں بطور فطرہ دیئے جاتے تھے؟
احادیث اور روایات کا ذخیرہ چھان مارنے سے ان چار چیزوں کے علاوہ کسی بھی دوسرے غلے کے بارے میں صراحت نہیں ملتی کہ صحابہ کی جماعت نے اسے بھی فطرہ میں دیا ہوا۔
صرف ایک صحابیہ اسماء رضی اللہ عنہا کے بارے میں ملتا ہے کہ وہ عہدرسالت میں گیہوں نکالتی تھی لیکن یہاں ابوسعید الخدری رضی اللہ عنہ کی حدیث میں ’’صَاعًا مِنْ طَعَامٍ‘‘ سے گیہوں مراد نہیں لیا جاسکتا کیونکہ یہ الفاظ کہنے والے ابوسعید الخدری رضی اللہ عنہ نے اپنے علم کے مطابق یہ صراحت کررکھی ہے کہ گیہوں عہدرسالت میں نہیں نکالا گیا بلکہ امیر معاویہ رضی اللہ عنہ کے دور میں نکالا گیا ، کماسیاتی۔ اورچونکہ ابوسعید الخدری رضی اللہ عنہ نے ’’صاعا ًمن طعام‘‘ کہہ کر عہدرسالت کے دور کی حالت بیان کی ہے اس لیے ان کے ان الفاظ میں گیہوں کے شامل ہونے کا سوال ہی پیدا نہیں ہوتا۔
نیز ابوسعید الخدری رضی اللہ عنہ نے’’صاعاً من طعام‘‘ میں مقدار ایک صاع بتلائی ہے جبکہ اسماء رضی اللہ عنہ کی جانب سے عہدرسالت میں گیہوں دینے کی جو بات ملتی اس میں صراحت ہے کہ وہ نصف صاع دیتی تھیں ، اس میں بھی اس بات کی دلیل ہے کہ ابوسعید الخدری رضی اللہ عنہ کے مذکورہ الفاظ سے گیہوں مراد نہیں ہے۔
مزید برآں یہ کہ ابوسعید الخدری رضی اللہ عنہ فطرہ میں سرے سے گیہوں نکالنے پر عمل ہی نہیں کرتے تھے اور یہ کہتے کہ میں نبی ﷺ کے دور میں جن چیزوں کا فطرہ دیتا تھا نبی ﷺ کے بعد بھی صرف انہی چیزوں کو فطر ہ میں دوں گا کماسیاتی ۔
رابعاً:
ابوسعید الخدری رضی اللہ عنہ ہی سے یہ حدیث بہت سارے طرق سے مروی ہے اور کئی طرق میں ’’صاعاً من طعام‘‘ کے الفاظ نہیں ہیں بلکہ صرف چار چیزوں ہی کا ذکر ہے مثلاً:
عن أبي سعيد :’’ لم نزل نخرج زكاة الفطر على عهد رسول اللّٰه صلى اللّٰه عليه وسلم صاعا من تمر، أو شعير، أو أقط، أو زبيب‘‘۔
صحابیٔ رسول ابوسعید الخدری رضی اللہ عنہ فرماتے ہیں :’’کہ ہم اللہ کے رسول ﷺ کے دور میں ایک صاع کجھور یا جَویا پنیر یا کشمش نکالا کرتے تھے‘‘
[مسند أحمد ط المیمنیۃ:۳؍۲۳،واسنادہ صحیح علی شرط مسلم واخرجہ ایضا عبدالرزاق فی مصنفہ (۳؍۳۱۶)من طریق داؤد بہ]
یہ بھی اس بات کی دلیل ہے کہ ’’صَاعًا مِنْ طَعَامٍ‘‘ سے ابوسعید الخدری رضی اللہ عنہ کی مراد وہی چار چیزیں ہیںجن کی تفصیل انہوں نے بعد میں پیش کردی ہے ورنہ اس حدیث میں ’’صاعا ًمن طعام‘‘ کے الفاظ نہ ہونے کی صورت میں اس غلے کا ذکر آنا لازمی تھا جو’’صَاعًا مِنْ طَعَامٍ‘‘ سے مراد تھا !
یادرہے ’’صاعا ًمن طعام‘‘ کہہ کر ابو سعید الخدری رضی اللہ عنہ نے نبی ﷺ کا قول وفرمان پیش نہیں کیا ہے بلکہ ماضی میں عہدرسالت کا ایک عمل پیش کیا ہے۔
خامساً:
امیر معاویہ رضی اللہ عنہ نے جب نصف صاع گیہوں بھی نکالنے کی بات کہی تو اس وقت ابوسعید الخدری رضی اللہ عنہ نے نہ صرف یہ کہ نصف صاع گیہوں نہیں نکالا بلکہ ایک صاع بھی گیہوں نہیں نکالا یعنی ابوسعید الخدری رضی اللہ عنہ نے فطرہ میں سرے سے گیہوں ہی نکالنے سے اجتناب کیا اور صرف ان چار چیزوں میں سے ہی فطرہ نکالتے رہے جو انہوں نے اپنی حدیث میں بیان کیا ہے ۔
اس سے صاف معلوم ہوتا ہے کہ ’’صاعا ًمن طعام‘‘ سے ان کی مراد عام غلہ ہرگز نہیں ہے ورنہ وہ گیہوں میں ایک صاع فطرہ ضرور نکالتے ۔
ملاحظہ فرمائیں ابوسعید الخدری رضی اللہ عنہ کے موقف سے متعلق روایات:
امام مسلم رحمہ اللہ (المتوفی۲۶۱) نے کہا:
حدثنا عبد اللّٰه بن مسلمة بن قعنب، حدثنا داؤد يعني ابن قيس، عن عياض بن عبد اللّٰه، عن أبي سعيد الخدري، قال:’’كنا نخرج إذ كان فينا رسول اللّٰه صلى اللّٰه عليه وسلم زكاة الفطر، عن كل صغير، وكبير، حر أو مملوك، صاعا من طعام، أو صاعا من أقط، أو صاعا من شعير، أو صاعا من تمر، أو صاعا من زبيب فلم نزل نخرجه حتي قدم علينا معاوية بن أبي سفيان حاجا، أو معتمرا فكلم الناس على المنبر، فكان فيما كلم به الناس أن قال:إني أري أن مدين من سمراء الشام، تعدل صاعا من تمر فأخذ الناس بذلك قال أبو سعيد:فأما أنا فلا أزال أخرجه كما كنت أخرجه، أبدا ما عشت‘‘۔
صحابیٔ رسول ابوسعید خدری رضی اللہ عنہ کہتے ہیں:’’ کہ ہم رسول اللہ ﷺ کے زمانہ میں صدقہ فطر ہر چھوٹے، بڑے، آزاداور غلام کی طرف سے ایک صاع طعام یعنی ایک صاع پنیر یا جَو یا کھجور یا کشمش نکالتے تھے پھر جب امیر معاویہ رضی اللہ عنہ حج یا عمرہ کو آئے تو لوگوں میں منبر پر وعظ کیا اور اس میں کہا کہ میں جانتا ہوں کہ دو مد (یعنی نصف صاع) شام کا سرخ گیہوں (قیمت میں ) ایک صاع کھجور کے برابر ہوتاہے ، تو لوگوں نے اس بات کو قبول کرلیا اور ابوسعید خدری رضی اللہ عنہ نے کہا:میں تو تاحیات فطرہ میں وہی نکالتا رہوں گا جو اللہ کے نبی ﷺ کے دور میں نکالا کرتاتھا ‘‘۔
[صحیح مسلم:۳؍۶۷۸،رقم۹۸۵]
امام مسلم رحمہ اللہ (المتوفی۲۶۱)نے کہا:
حدثني عمرو الناقد، حدثنا حاتم بن إسماعيل، عن ابن عجلان، عن عياض بن عبد اللّٰه بن أبي سرح، عن أبي سعيد الخدري:’’أن معاوية، لما جعل نصف الصاع من الحنطة، عدل صاع من تمر، أنكر ذٰلك أبو سعيد، وقال:لا أخرج فيها إلا الذى كنت أخرج فى عهد رسول اللّٰه صلى اللّٰه عليه وسلم: صاعا من تمر، أو صاعا من زبيب، أو صاعا من شعير، أو صاعا من أقط ‘‘۔
صحابیٔ رسول ابوسعید رضی اللہ عنہ نے کہا:’’جب امیرمعاویہ رضی اللہ عنہ نے نصف صاع کھجور کو ایک صاع گیہوں کے برابر مقرر کیا تو ابوسعید رضی اللہ عنہ نے انکار کیا اور کہا میں تو (فطرہ میں) وہی دوں گا جو رسول اللہ ﷺ کے زمانے میں دیتا تھا یعنی ایک صاع کھجور یا ایک صاع کشمش یا ایک صاع جَو یا ایک صاع پنیر‘‘۔
[صحیح مسلم: ۳؍۶۷۹، رقم۹۸۵]
تنبیہ: فطرہ میں گیہوں نہ نکالنے سے متعلق ابوسعید الخدری رضی اللہ عنہ کی جو روایت ابن عجلان سے مختلف طرق سے مروی ہے اس میں صحیح روایت وہی ہے جسے امام مسلم کے حوالہ سے اوپر درج کیا تھا ۔اس کے علاوہ ابن عجلان کی جو دیگرروایات ہیں ان میں شدید اضطراب ہے اس لیے وہ صحیح نہیں ہیں انہی میں سے ایک روایت یہ بھی ہے کہ :
’’لا أخرج أبدا إلا صاعا ‘‘۔
’’یعنی میں ایک ہی صاع ہمیشہ نکالوں گا‘‘۔
[سنن أبی داؤد:۲؍۱۱۳رقم۱۶۱۸،وضعفہ الالبانی]
اس سے بظاہر یہ معلوم ہوتا ہے کہ ابوسعید الخدری رضی اللہ عنہ نے آدھا صاع نکالنے سے اختلاف کیا تھا اور ایک صاع نکالنے کی بات کہی تھی ۔ غالباً اس جیسی روایت کے پیش نظر ہی بعض اہل علم نے یہ سمجھ لیا ہے کہ ابوسعید الخدری رضی اللہ عنہ کا اختلاف صرف مقدار متعین کرنے میں تھا۔
لیکن یہ روایت صحیح نہیں علامہ البانی رحمہ اللہ نے اسے ضعیف قرار دیا ہے۔
مزید یہ کہ اسی روایت کے دیگر طرق میں الگ الفاظ ہیں جو اس بات پر دلالت کرتے ہیں کہ ابوسعید الخدری رضی اللہ عنہ گیہوں میں ایک صاع بھی نکالنے کے منکر تھے اور صرف انہی چیزوں میں ایک صاع نکالنے کے قائل تھے جن پر عہد رسالت میں ان کا عمل تھا، چنانچہ مسند احمد کی ایک روایت میں اس کے الفاظ یوں ہیں:
حدثنا يحيي بن سعيد، عن ابن عجلان، حدثنا عياض بن عبد اللّٰه، عن أبي سعيد قال:’’لا أخرج أبدا إلا صاعا من تمر، أو شعير، أو أقط، أو زبيب‘‘۔
ابوسعید الخدری رضی اللہ عنہ نے کہا:’’میں نہیں نکالوں گا مگر صرف ایک صاع کھجور یا ایک صاع جو یا ایک صاع پنیر یا ایک صاع کشمش‘‘
[مسند أحمد (طبعۃ عالم الکتب):۴؍۲۴۵،رقم۱۱۹۶۲م ، ورجالہ ثقات]
نیز ابن عجلان ہی کی ایک دوسری روایت کے مطابق ابو سعید الخدری رضی اللہ عنہ نے حصر کے ساتھ ذکر کیا ہے کہ عہدرسالت میں ہم صرف چارچیزوں ہی سے فطرہ نکالتے تھے اور میں انہی سے ہی فطر ہ نکالوں گا۔ چنانچہ:
محمد بن عبد الرحمن المخَلِّص (المتوفی۳۹۳) نے کہا:
حدثنا أحمد،حدثنا علي،حدثنا المعافي،حدثنا القاسم، عن محمد بن عجلان، عن عياض قال:أمر معاوية بصدقة الفطر بمدين قمح ، فقال أبوسعيد الخدري:’’لا أخرج إلا كما كنا نخرج علٰي عهد رسول اللّٰه صلى اللّٰه عليه وسلم، فإنا لم نخرج إلا صاعا من تمر، أو صاع زبيب، أو صاعا من شعير، أو صاعا من أقط ‘‘۔
ابوسعید الخدری رضی اللہ عنہ نے کہا:’’میں فطرہ میں نہیں نکالوں گا مگر ویسے ہی جیسے عہد رسالت میں ہم نکالتے تھے اور عہد رسالت میں ہم نے ایک صاع کھجور، یا ایک صاع کشمش، یا ایک صاع جَو ، یا ایک صاع پنیر کے علاوہ کچھ نہیں نکالا ‘‘۔
[المخلصیات:۲؍۲۳ورجالہ ثقات]
ابن عجلان ہی کی ان روایات سے صراحتاً معلوم ہوتا ہے کہ ابوسعید الخدری رضی اللہ عنہ فطرہ میں سرے سے گیہوں نکالنے کے قائل ہی نہ تھے ۔
لیکن ہماری نظر میں ابن عجلان کے طریق سے آنے والی ابوسعید الخدری رضی اللہ عنہ کی صرف وہی حدیث معتبر ہے جو صحیح مسلم میں ہے یا جس کی تائید دیگر صحیح روایات سے ملتی ہے باقی ابن عجلان کی دیگر منفرد روایات معتبر نہیں ہیں کیونکہ ان کی بیان کردہ حدیث میں کئی طرح کا اضطراب ہے ، واللہ اعلم۔
نیز اس کو صحیح بھی مان لیں تو اس کا مطلب صرف یہ ہوگا کہ ابوسعید الخدری رضی اللہ عنہ نے مقدار میں بھی امیر معاویہ رضی اللہ عنہ سے اختلاف کیا تھا اورسرے سے گیہوں نکالنے سے بھی اختلاف کیا تھا جیساکہ صاحب مرعاۃ کے الفاظ میں اس کی وضاحت آگے آرہی ہے۔
بہرحال درج بالا روایات سے معلوم ہوتا کہ ابوسعید خدری رضی اللہ عنہ نے صرف قیمت کے اعتبارہی سے اختلاف نہیں کیا بلکہ انہوں نے سرے سے گیہوں دینے ہی سے اختلاف کیا ہے اور یہ کہا ہے کہ میں عہدرسالت میں جو دیتاتھا وہی آج بھی دوں گا ۔
امام ابن حزم رحمہ اللہ (المتوفی۴۵۶)کہتے ہیں:
’’ فهذا أبو سعيد يمنع من البر جملة ‘‘۔
’’ابوسعیدخدری رضی اللہ عنہ سرے سے گیہوں دینے ہی کے خلاف تھے‘‘۔
[المحلی لابن حزم، ت بیروت:۴؍ ۲۵۲]
علامہ عبید اللہ الرحمانی المبارکفوری (المتوفی ۱۴۱۴ھ) لکھتے ہیں:
’’قد عرفت مما قدمنا إن أباسعيد كان يرى إن الواجب من كل شيء صاع خلافاً لمعاوية، ومن وافقه، ولكنه لم يخرج من البر قط لا صاعاً ولا نصفه لا، لأنه ما كان يعرف القمح فى الفطرة بل إتباعاً لما كان يفعله الصحابة فى زمانه ﷺ من إخراج غير البر، وكذا ابن عمر ‘‘۔
’’ہماری سابقہ تفصیلات سے یہ بات واضح ہوچکی ہے کہ امیر معاویہ رضی اللہ عنہ اور ان کے موافقین سے اختلاف کرتے ہوئے ابو سعید الخدری رضی اللہ عنہ کا خیال یہ تھا کہ ہر چیز میں ایک صاع ہی واجب ہے ۔لیکن ابوسعید الخدری رضی اللہ عنہ نے گیہوں سے صدقہ الفطر نکالا ہی نہیں ، نہ ایک صاع اور نہ آدھا صاع ، لیکن اس کا یہ مطلب نہیں کہ وہ فطرہ میں گیہوں کو ناجائز سمجھتے تھے بلکہ وہ گیہوں سے فطرہ نہ نکال کرکے عہد رسالت میں صحابہ کرام رضی اللہ عنہم کے تعامل کی اتباع کرنا چاہتے تھے اور ٹھیک یہی معاملہ ابن عمر رضی اللہ عنہ کا بھی تھا‘‘۔
[مرعاۃ المفاتیح شرح مشکاۃ المصابیح:۶؍۱۹۷]
اس پوری تفصیل سے معلوم ہواکہ ابوسعید الخدری رضی اللہ عنہ نے فطرہ میں دی جانے والی صرف چار چیزوں کو بیان کیا ہے اور وہ پوری زندگی صرف انہی چار چیزوں سے ہی فطرانہ دیتے رہے۔اور یہی معاملہ عبداللہ بن عمر رضی اللہ عنہ کا بھی تھا کہ وہ بھی صرف انہی چیزوں سے فطرہ نکالتے تھے جو ان کی روایت کردہ حدیث میں مذکور ہیں ۔