-
اس سنت کو بھی زندہ کریں!!! اللہ کی طرف سے انسان جن مختلف حالات کا شکار ہوتا ہے انہی میں سے ایک چیز ’’مرض و بیماری‘‘ بھی ہے،بیماری کا آنا اور بیمار ہو جانا بھی اللہ کی ایک نعمت ہے، کس حساب سے؟ اس طرح کہ بیماری گناہوں کے کفارے کا ذریعہ بھی بنتی ہے اور دوسرے لوگوں کی نیکیوں اور اجر و ثواب میں اضافے کا سبب بھی، کیونکہ جب کوئی انسان بیماری میں مبتلا ہوتا ہے تو وہ مشکل دور سے گزر رہا ہوتا ہے اس لیے اس پر صبر کرنے سے اس کو ثواب بھی ملتا ہے اور اس کے گناہ بھی مٹتے ہیں، ساتھ ہی اس کی عیادت اور تیمارداری کے لیے آنے والے لوگ بھی اپنے لیے اجر و ثواب جمع کر لیتے ہیں، مریض کی عیادت ایک بہترین عمل ہے، اللہ کے رسولﷺکی سنت بھی ہے اور ایک مسلمان کا دوسرے مسلمان پر حق بھی جسے ادا ضرور کیا جانا چاہیے۔
حدیثوں میں آپ ﷺنے مریض کی عیادت کرنے کی ترغیب دلائی ہے اور خود بھی آپ نے اس پرعمل کر کے بتایا ہے،اسی لیے آپ ﷺکی سیرت پڑھتے ہوئے قاری کئی بار آپ کی زندگی کے اس پہلو کا بھی مطالعہ کرتا ہے کہ کس طرح آپ نے سرورِ کائنات ہو کر بھی محسنِ انسانیت کی مثال پیش کی ہے اور اپنے سے کم تر لوگوں کی خبر گیری کی ہے، بیمار ہونے پر ان کی عیادت کی ہے اور اس عمل پر اجر و ثواب بھی بتلایا ہے، مختلف احادیث میں مریض کی عیادت کرنے پر مختلف طرح کی فضیلتیں معلوم ہوتی ہیں:
۱۔عَنْ ثَوْبَانَ عَنِ النَّبِيِّﷺقَالَ: ’’إِنَّ الْمُسْلِمَ إِذَا عَادَ أَخَاهُ الْمُسْلِمَ لَمْ يَزَلْ فِي خُرْفَةِ الْجَنَّةِ حَتَّي يَرْجِعَ‘‘
حضرت ثوبان رضی اللہ عنہ کہتے ہیں کہ نبی کریم ﷺنے فرمایا:’’ایک مسلمان جب اپنے مسلمان بھائی کی عیادت کے لیے جاتا ہے تو واپس آنے تک گویا کہ وہ جنت کے پھل توڑنے میں مشغول ہوتا ہے‘‘
[صحیح مسلم:۲۵۶۸]
۲۔ عَنْ أَبِي هُرَيْرَةَ قَالَ قَالَ رَسُولُ اللّٰهِ ﷺ:’’مَنْ عَادَ مَرِيضًا أَوْ زَارَ أَخًا لَهُ فِي اللّٰهِ نَادَاهُ مُنَادٍ أَنْ طِبْتَ وَطَابَ مَمْشَاكَ وَتَبَوَّأْتَ مِنَ الجَنَّةِ مَنْزِلًا‘‘
حضرت ابو ہریرہ رضی اللہ عنہ کہتے ہیں کہ اللہ کے رسولﷺنے فرمایا:’’جو اللہ کے لیے کسی مریض کی عیادت کرتا ہے یا اپنے بھائی سے ملاقات کرتا ہے تو ایک منادی ندا لگاتا ہے کہ تو نے اچھا کام کیا اور تو نے جنت میں اپنے لیے ایک گھر بھی بنا لیا‘‘
[سنن ترمذی :۲۰۰۸،حسن]
۳۔ ’’مَا مِنْ مُسْلِمٍ يَعُودُ مُسْلِمًا غُدْوَةً إِلَّا صَلَّي عَلَيْهِ سَبْعُونَ أَلْفَ مَلَكٍ حَتّٰي يُمْسِيَ، وَإِنْ عَادَهُ عَشِيَّةً إِلَّا صَلَّي عَلَيْهِ سَبْعُونَ أَلْفَ مَلَكٍ حَتَّي يُصْبِحَ، وَكَانَ لَهُ خَرِيفٌ فِي الجَنَّةِ‘‘
حضرت علی رضی اللہ عنہ کہتے ہیں کہ میں نے اللہ کے رسول ﷺکو فرماتے ہوئے سنا کہ: ’’جو صبح کے وقت کسی بیمار کی عیادت کرتا ہے تو شام تک ستّر ہزار فرشتے اس کے لیے دعا کرتے رہتے ہیں اور جو شام کے وقت عیادت کرتا ہے تو صبح تک ستر ہزار فرشتے اس کے لیے دعا کرتے رہتے ہیں‘‘
[سنن ترمذی:۹۶۹،صحیح]
محترم قارئین! آج لوگ مختلف طرح کی بیماریوں میں مبتلا ہیں، بیماریاں روز بڑھتی جا رہی ہیں، اسپتالوں اور دواخانوں کے اندر مریض رکھنے کی مزید گنجائش نہیں ہے، اگر کسی اسپتال کا چکر لگایا جائے تو ایسا محسوس ہوتا ہے کہ اس علاقے کے سارے لوگ یہیں جمع ہیں اور پورا علاقہ ہی بیمار ہے اور بیماریوں کی زد میں ہے، لیکن تیمارداری کرنے والوں کا دور دور تک پتہ نہیں، امراض اور مریضوں پر افسوس کرنے والے تو بہت ہیں لیکن ان کی عیادت کرنے والے بہت کم، بحیثیت ِمسلمان ہماری یہ ذمہ داری ہے کہ ہم اس سنت کو بھی زندہ کریں ، ہماری شریعت نے ہمیں اس عمل کے اتنے فائدے بتلائے ہیں پھر بھی ہم مریض کی عیادت سے دور بھاگتے ہیں، ہم نے اس پیاری سنت کو بھی ترک کر دیا ہے، ہم مریض کی عیادت کرنا اور اس کے دکھ درد میں شریک ہونا بھول گئے ہیں یہاں تک کہ اگر ہمارا پڑوسی بیمار ہو جائے تو ہم اس کی بھی خبر گیری نہیں کرتے،جبکہ حقیقت یہ ہے کہ اس عمل میں سراسر فائدہ عیادت کرنے والے کا ہے:
۱۔ سنت پر عمل کا ثواب
۲۔ سنت زندہ کرنے کا ثواب
۳۔ مسلمان کا حق ادا کرنے پر اجر
۴۔ ستر ہزار فرشتوں کی دعا کا مستحق
۵۔ جنت میں پھل توڑنے جیسا موقع
۶۔ جنت میں ایک گھر کا مالک
۷۔ بیماریوں سے اللہ کی پناہ مانگنے کا موقع
۸۔ دکھ اور تکلیف میں کسی کے لیے مرہم اور دوا بن جانے کا چانس
۹۔ کسی کے لیے خوشی اور مسرت کا سبب بن جانا
۱۰۔ اللہ کی رضا کا حصول
کام صرف ایک اور فوائد اتنے کہ اگر ان کا تعلق دنیاوی چیزوں سے ہو تو لوگوں کی بھیڑ کو کنٹرول کرنا مشکل ہو جائے، فیصلہ آپ کریں کہ آپ کیا چاہتے ہیں؟دنیا یا سنت کو زندہ کر کے آخرت؟
نیا شمارہ
