-
تاکہ تم متقی ہوجاؤ ! روزہ کی فرضیت کااصل مقصدکیا ہے بہت سے لوگ اس سے غافل ہیں عام طورسے لوگ یہی سمجھتے ہیں کہ صبح سے شام تک فسق وفجورسے اجتناب اور بھوک وپیاس میں پورا دن گذاردینے اورشام کو بہترسے بہتر افطار کرلینے سے روزے کامقصود حاصل ہوگیا ،حالانکہ یہ سب کچھ روزے کامقصدنہیںبلکہ صحت روزہ کے لوازم ہیں ،اوراصل مقصدتک رسائی کے ذرائع ہیں ،وہ اصل مقصدکیا ہے ،خود قران نے اسے پوری صراحت کے ساتھ بیان کردیاارشادہے:
{ يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَي الَّذِينَ مِنْ قَبْلِكُمْ لَعَلَّكُمْ تَتَّقُونَ } (البقرۃ183)۔
اے ایمان والو! تم پر روزے رکھنا فرض کیا گیا جس طرح تم سے پہلے لوگوں پر فرض کئے گئے تھے، تاکہ تم متقی بن جاؤ ۔
رمضان المبارک میں روزوں کی فرضیت کامقصد اللہ تعالی نے یہ بتایا:’’ تاکہ تم متقی بن جاؤ‘‘، روزہ سے تقوی کیسے آتاہے سب سے پہلے اس بات پرغورکرناچاہئے۔
روزہ دار نہ تو لوگوں کے سامنے کھاتا پیتا ہے اورنہ ہی لوگوں سے چھپ کربندکمرے اور تنہائی میں، سوال یہ ہے کہ تنہائی میں اسے کھانے پینے سے کس چیزنے روکاہے؟ یقینااس کاایمان وعقیدہ اوراللہ کاخوف ہی ہے جو تنہائی میں بھی اسے حکم الہی کاپاپندکرتاہے۔
تنہائی میں جب کوئی نہ دیکھ رہاہو تو یہ اعتقاد کہ اللہ دیکھ رہاہے اوراس کی پکڑسے بچنے کی فکریہ تقوی کی سب سے اعلم قسم ہے اورصحیحین کی ایک روایت میںا ن لوگوں کے لئے حشرکے دن عرش الہی کے سایہ کی بشارت ہے جوتنہائی میں اللہ کے خوف سے روپڑتے ہیں۔
یعنی تنہائی میں بھی اللہ کی پکڑسے بچنے کی فکریہ تقوی سب سے اعلی قسم ہے اورتقوی کی یہ قسم سب سے بہترطورپرروزہ ہی سے حاصل ہوتی ہے،روزہ کا مقصدانسان کے اندراس احساس کوپیداکرنا ہے کہ اللہ واحدہرشے اورہرجگہ سے باخبرہے لہٰذا جلوت ہو یاخلوت ہرجگہ اس سے ڈرتے رہناچاہئے ،تقوی کی یہ خوبی جس قدروزے سے حاصل ہوتی ہے کسی اورعبادت سے نہیں۔
روزے دارتنہائی میں ہوتا ہے ایسی حالت میں اسے کوئی نہیں دیکھتا لیکن اس کا ایمان وعقیدہ ہوتاہے کہ گرچہ کوئی نہیں دیکھ رہا ہے لیکن اللہ تو دیکھ رہا ہے ، اللہ کے ڈرسے روزہ دار تنہائی میں بھی اللہ کی نافرمانی نہیں کرتاہے۔
اللہ چاہتا ہے کہ تم اسی طرح ہرمعاملے میں متقی بن جاؤ ،یعنی روزہ سے ہٹ کر بھی جب تمہارے دل میں کسی برائی کا ارادہ ظاہر ہو تو یہی روزہ والا تقوی بروئے کار لاؤ اور سوچو کہ گرچہ کوئی ہماری برائی سے آگاہ نہیں لیکن اللہ کی نظر سے تو ہم نہیں بچ سکتے ۔
یہ سکھانے کے لئے تمہیں روزہ کی عبادت دی گئی ہے کہ تم اسی طرح ہرمعاملے میں متقی بن جاؤ ۔
{ يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَي الَّذِينَ مِنْ قَبْلِكُمْ } (البقرۃ183)۔
اے ایمان والو! تم پر روزے رکھنا فرض کیا گیا جس طرح تم سے پہلے لوگوں پر فرض کئے گئے تھے۔
لَعَلَّكُمْ تَتَّقُونَ (البقرۃ: 183)
تاکہ تم متقی بن جاؤ۔۔تاکہ تم متقی بن جاؤ۔
۔۔۔۔۔۔۔۔۔۔۔۔۔۔۔۔۔ابوالفوزان السنابلی۔
نیا شمارہ
