-
بَشَرًا رَسُولًاً (۲) اللہ کے فیصلہ پر اعتراض
نبوت اللہ کے انعامات میں سے ایک انعام ہے اور اللہ اپنے معاملہ میں بالکل آزاد و بااختیار ہے کہ وہ جسے چاہے اپنی اس نعمت سے سرفراز فرمانے کے لیے منتخب کرے ۔ کسی بندے کو یہ حق نہیں پہنچتا کہ وہ اس معاملہ میں اللہ کے ساتھ اختلاف کرے ۔ بندوں کا کام یہ ہیکہ وہ اللہ کے بنائے گئے رسول کے ہاتھوں اپنی تابعداری اور وفاداری کی لگام سونپ دیں نہ یہ کہ وہ اللہ کے کیے ہوئے فیصلہ میں عیب تلاش کریں اور اللہ کو بتلائیں کہ اسے کسے اور کس طرح کا رسول بنانا چاہیے ۔ اللہ سے اس کے افعال کے بارے سوال نہیں کیا جاسکتا۔بلکہ خود انسان کو اپنے اعمال کا جواب اللہ کے سامنے دینا ہوگا۔
{لَا يُسْأَلُ عَمَّا يَفْعَلُ وَهُمْ يُسْأَلُونَ}
اللہ سے اس کے افعال کے بارے باز پرس نہیں کی جائے گی انسانوں سے ان کے اعمال کے متعلق سوال کیا جائے گا۔ (الأنبیاء : ۲۳)
(اللَّهُ أَعْلَمُ حَيْثُ يَجْعَلُ رِسَالَتَهُ )
اللہ جانتا ہے کسے رسول بنانا ہے (الأنعام:۱۲۴)
{ أَمْ عِنْدَهُمْ خَزَائنُ رَحْمَةِ رَبِّكَ الْعَزِيزِ الْوَهَّابِ ٭أَمْ لَهُمْ مُلْكُ السَّمَاوَاتِ وَالْأَرْضِ وَمَا بَيْنَهُمَا فَلْيَرْتَقُوا فِي الْأَسْبَابِ ٭}
کیا ان کے پاس تیرے غالب اور داتا رب کے خزانے ہیں یا آسمان و زمین اور جو کچھ بھی ان کے درمیان ہے یہ ان کی ملکیت ہے ۔ اگر ہاں تو یہ آسمانوں میں چڑھ کر دکھائیں ، (ص: 9، 10)
سورہ ص کی یہ آیات اصل میں کفار کے اس تعجب کا جواب ہے جس کا ذکر آیت نمبر ۴ میں اللہ نے فرمایا ہے ۔
{وَعَجِبُوا أَنْ جَاء هُمْ مُنْذِرٌ مِنْهُمٌ}
اور ان کو اس بات پر تعجب ہوا کہ ڈرانے والا انہیں میں سے کیوں بنا کر بھیجا گیا ۔ (ص: ۴)
یعنی ان کفار کو اس بات پر بڑا تعجب ہوتا ہے کہ اللہ نے ایک بشر کو نبی کیوں کر بنا دیا ۔ تو کیا اللہ نے اپنے خزانوں کی کنجیاں ان کے سپرد کردی ہیں کہ یہ طے کریں گے کہ کون رسول بنائے جانے کا مستحق اور کون نہیں ۔ یا اللہ آسمان و زمین کی ملوکیت سے دستبردار ہوگیا ہے اور نبی و رسول کا انتخاب ان کے سپرد کردیا گیا ہے وہ جسے چاہیں نبوت کے لیے منتخب کر لیں اور جسے چاہیں نا قابل نبوت قرار دے دیں ۔
اللہ کی سنت اور کفار کا تعجب
کفار کے پاس اپنے اس عقیدہ کے ثبوت کے لیے کہ نبی بشر نہیں ہوسکتا سوائے استغراب وتعجب کے کوئی دلیل نہیں تھی لیکن محض تعجب کسی چیز کے ثبوت کے لیے دلیل نہیں بن سکتا ۔ اللہ کی سنت یہی رہی ہیکہ وہ انسانوں ہی کو نبی بناکر بھیجتا ہے ۔ اور کفار کے تعجب سے یہ حقیقت تبدیل نہیں ہوجانے والی ۔
{وَمَا أَرْسَلْنَا مِنْ قَبْلِكَ إِلَّا رِجَالًا نُوحِي إِلَيْهِمْ}
ہم نے آپ سے پہلے مردوں ہی کو رسول بنا کر بھیجا ۔ (یوسف: ۱۰۹)
کفار کو اس بات پر تعجب تھا کہ یہ کیسا نبی ہے جو کھانا کھاتا ہے بازاروں میں چلتا ہے ۔
{وَقَالُوا مَالِ هَذَا الرَّسُولِ يَأْكُلُ الطَّعَامَ وَيَمْشِي فِي الْأَسْوَاقِ لَوْلَا أُنْزِلَ إِلَيْهِ مَلَكٌ فَيَكُونَ مَعَهُ نَذِيرًا }
کہتے کیسا نبی ہے جو کھانا کھاتا ہے بازاروں میں گھومتا ہے ۔ اس کے ساتھ کوئی فرشتہ کیوں نہیں نازل کردیا گیا ، جو اس کے ساتھ رہتا اور لوگوں کو ڈراتا، (الفرقان: ۷)۔
ان کے اس تعجب کا جواب اللہ نے دیا ۔
{وَمَا أَرْسَلْنَا قَبْلَكَ مِنَ الْمُرْسَلِينَ إِلَّا إِنَّهُمْ لَيَأْكُلُونَ الطَّعَامَ وَيَمْشُونَ فِي الْأَسْوَاقِ}
ہم نے آپ سے پہلے جتنے بھی رسول بھیجے وہ سب کھانا بھی کھاتے اوربازاروں میں چلتے بھی تھے،(الفرقان: ۲۰)۔
{وَمَا أَرْسَلْنَا قَبْلَكَ إِلَّا رِجَالًا نُوحِي إِلَيْهِمْ فَاسْأَلُوا أَهْلَ الذِّكْرِ إِنْ كُنْتُمْ لَا تَعْلَمُونَ ٭وَمَا جَعَلْنَاهُمْ جَسَدًا لَا يَأْكُلُونَ الطَّعَامَ وَمَا كَانُوا خَالِدِينَ }
ہم نے آپ سے پہلے مردوں ہی کو رسول بنا کر بھیجا ہے ۔ تم اگر نہیں جانتے تو جاننے والوں سے معلوم کرلو۔ ہم ان کو ایسا جسم نہیں دیاتھا جو کھانے سے بے نیاز ہو اور نہ ہی وہ ہمیشہ ہمیش زندہ رہنے والے تھے ، (الأنبیاء : ۷،۸)۔
تو اللہ کی اس سنت پر اگر کفار کو تعجب ہے تو یہ ان کی عقل کا فتور ہے ان کے پاس عقل و نقل سے کوئی دلیل نہیں جس سے وہ اپنے اس تعجب کو جواز فراہم کرسکیں لہذا ان کا یہ تعجب ان کو کوئی فائدہ نہیں پہنچا سکتا ہے۔ اور نہ وہ اس تعجب کو اللہ کی بارگاہ میں عذر کے طور پر پیش کرسکتے ہیں۔
رسول بشر اللہ کا احسان
یہ اللہ کا احسان ہے کہ اس نے انسانوں میں انسان کو رسول بنا کر بھیجا ۔ جن سے انسان بغیر کسی تکلف کے اخذ استفادہ کرسکتے ہیں ۔ کیونکہ رسول کا کام صرف اللہ کا کلام پہنچادینے تک محدود نہیں ہوتا بلکہ اس سے آگے بڑھ کر تزکیہ و تعلیم کی عظیم ذمہ داریاں اس کے سپرد ہوتی ہیں ۔ انسانوں کی تعلیم اور تزکیہ صرف کسی انسان ہی کے لیے ممکن ہے ۔ کیونکہ انسان کسی دوسری جنس سے مانوس نہیں ہوتا۔ اور انسیت تربیت و تزکیہ کے لیے لازمی شرط ہے ۔ ۔ فرشتے اس عالم کی مخلوق نہیں ہیں ۔ انسان ان کو دیکھ نہیں سکتا ۔ نہ ہی ان سے تعلیم و تزکیہ کا حصول اس کے لیے ممکن ہے ۔ اور اگر فرشتوں کو ان کی اصلی شکل میں دیکھ بھی لے تو ان سے مانوس نہیں ہوسکتا ۔ پھر اگر فرشتوں کے کہنے پر ایمان لے بھی آئے تو ایسے ایمان میں اپنے اختیار سے زیادہ دخل فرشتوں کی ہیبت اور جلال کا ہوگا۔ ان سارے وجوہات کی بنا پر اللہ نے انسانوں کے درمیان ایک انسان کو نبی بنا کر بھیجا اور بلاشبہ انسانوں کے لیے انسان کا نبی بنایا جانا اللہ کی طرف سے اس کے بندوں پر رحمت ہے ۔ جس سے انسان بے تکلف اخذ و استفادہ کرسکیں ۔
{لَقَدْ مَنَّ اللَّهُ عَلَي الْمُؤْمِنِينَ إِذْ بَعَثَ فِيهِمْ رَسُولًا مِنْ أَنْفُسِهِمْ يَتْلُو عَلَيْهِمْ آيَاتِهِ وَيُزَكِّيهِمْ وَيُعَلِّمُهُمُ الْكِتَابَ وَالْحِكْمَةَ وَإِنْ كَانُوا مِنْ قَبْلُ لَفِي ضَلَالٍ مُبِينٍ}۔
اللہ نے مومنوں پر احسان کیا کہ انہیں میں سے ایک رسول ان کے درمیان بھیجا جو اللہ کی آیات ان پر تلاوت کرتا ہے ۔ ان کا تزکیہ کرتا ہے ۔ ان کو کتاب اور حکمت کی تعلیم دیتا ہے ۔گرچہ اس سے پہلے وہ لوگ کھلی ہوئی گمراہی کے شکار تھے ، (آل عمران: ۱۶۴)۔
{ كَمَا أَرْسَلْنَا فِيكُمْ رَسُولًا مِنْكُمْ يَتْلُو عَلَيْكُمْ آيَاتِنَا وَيُزَكِّيكُمْ وَيُعَلِّمُكُمُ الْكِتَابَ وَالْحِكْمَةَ وَيُعَلِّمُكُمْ مَا لَمْ تَكُونُوا تَعْلَمُونَ}
جیسے ہم نے تمہارے درمیان تم میں سے ہی ایک رسول بھیجا ۔ جو تم پر اللہ کی آیات تلاوت کرتا ہے ، تمہارا تزکیہ کرتا ہے ۔ تم کو اللہ کی کتاب اور حکمت کی تعلیم دیتا ہے جس کا تم کو اس سے پہلے علم نہیں تھا،(البقرۃ: ۱۵۱)۔
نیا شمارہ
