-
مَولیٰ کا حقیقی مفہوم اسلامی شریعت اہل مومن کو دین میں غلو اور زیادتی سے منع کرتی ہے ، چاہے و ہ غلو عقیدہ سے متعلق ہو یا دین کے کسی بھی عام مسئلے یا جزء سے متعلق ۔ جیسا کہ اللہ کا فرمان ہے : {لَا تَغْلُوْا فِي دِيْنِكُمْ…}’’کہ تم اپنے دین میں غلو اور حد سے تجاوز نہ کرو۔۔۔۔‘‘
[النساء:۱۷۱]
لیکن اس فرمانِ باری کو پیٹھ پیچھے ڈال کر آج امت کے بیشتر لوگ کئی مسائل میں غلو سے کام لیتے ہیں ۔ انہیں مسئلوں میں سے ایک مسئلہ ہے’’ حضرت ِعلی رضی اللہ عنہ کو مولیٰ تصور کرنے کا ‘‘۔
دراصل حدیث کے خزانوں میں سے ایک حدیث اللہ کے رسول ﷺکی خطبۂ غدیر خُم کے متعلق ملتی ہے جس کا پس ِمنظر مختصراًیہ ہے کہ اللہ کے رسول ﷺ نے خُم کے مقام پر ایک کنویں کے پاس کچھ صحابۂ کرام کو ایک بار خطبہ دیا تھا جس میں آپ نے علی رضی اللہ عنہ کے متعلق فرمایا تھا :’’مَنْ کُنْتُ مَوْلَاہُ فَعَلِیٌّ مَوْلَاہُ‘‘’’کہ جس کا میں دوست ہوں علی بھی اس کے دوست ہیں‘‘۔
[سنن الترمذی:۳۷۱۳،حکم الالبانی صحیح]
یہ حدیث بلاشبہ صحیح ہے جس سے علی رضی اللہ عنہ کا مر تبہ ان کی فضیلت و اہمیت واضح ہوتی ہے ۔لیکن اسی حدیث سے غلط مفہوم نکالنے کی وجہ سے غلو کے شکار کتنے مسلمان شرک میں مبتلا ہو گئے ۔ مثلاً کچھ تو اس حدیث کی بنا پر حضرت علی رضی اللہ عنہ کو مشکل کشا اورحاجت روا سمجھ بیٹھے ۔ جب کہ مشکلوں کو حل کرنے والا، حاجتوںکو پورا کرنے والا صرف اور صرف اللہ ہے ۔ کچھ شیعہ حضرات دو قدم اور آگے بڑھ کر علی رضی اللہ عنہ کو ہی سب کچھ سمجھ بیٹھے۔ اولاد دینے والا، موت و زندگی دینے والا،زمین و آسمان پیدا کرنے والا ، حاجت روائی کرنے والا اور قیامت کے دن مسندِ عدل پر بیٹھنے والا وغیرہ غیرہ سب کچھ علی رضی اللہ عنہ کو ہی سمجھ لیا۔ اسی طرح شیعہ حضرات مذکورہ حدیث سے یہ بھی ثابت کرنے کی کوشش کرتے ہیں کہ اللہ کے نبی ﷺنے مذکورہ حدیث بیان کرکے اپنے بعد علی رضی اللہ عنہ کی خلافت کی طرف اشارہ کیا تھا جس پر عمل نہ کرکے صحابہ غاصب ہوگئے ۔ نعوذباللہ۔ جبکہ حقیقت یہ ہے کہ نبیﷺ نے مذکورہ حدیث سے علی رضی اللہ عنہ کی خلافت کی طرف اشارہ نہیں کیا ہے بلکہ علی رضی اللہ عنہ سے محبت کو ایمان کا ایک جزو قرار دیا ہے ۔
محتصراً یہ کہ حدیث کا سادہ وصحیح مفہوم یہ ہے کہ’’ آ پﷺجس کے دوست ہیں اس کے دوست علی ہیں‘‘ ۔ آپ ﷺ سے جس کو محبت ہے اس کو علی رضی اللہ عنہ سے محبت ہونا چاہیے ۔ جونبی سے محبت کا دعویٰ کرے اور علی رضی اللہ عنہ سے محبت نہ کرے تو ایسے شخص کا ایمان خطرے سے خالی نہیں ہے ۔
نیا شمارہ
